پی ٹی آئی میں مایوسی قیادت نے خود پھیلائی ہے، مزاحمتی طاقت کوخود ہی تحریک انصاف نے پارہ پارہ کیا، شیر افضل مروت

اسلام آباد(اردوپوائنٹ اخبار تازہ ترین۔26 مئی 2025)رکن قومی اسمبلی شیر افضل مروت کا کہنا ہے کہ پی ٹی آئی میں مایوسی قیادت نے خود پھیلائی ہے،مزاحمتی طاقت کوخود ہی تحریک انصاف نے پارہ پارہ کیا، بانی پی ٹی آئی عمران خان کی خلاصی صرف احتجاج کے ذریعے ہو سکتی ہے، موجودہ قیادت احتجاج سے کتراتی ہے،دنیا نیوز کے پروگرام میں گفتگو کرتے ہوئے رکن قومی اسمبلی نے کہا کہ بانی پی ٹی آئی عمران خان کو اندازہ ہو گیا ان کی قیادت کے تلوں میں تیل نہیں۔

ذمہ داروں نے مجھے عمران خان سے ملاقات کرنے کا کہا ہے۔ اب میں اپنی مرضی سے جاوں یا نہیں جاوں گا۔ پہلے مانا جائے کہ میرے ساتھ زیادتی ہوئی پھرملاقات کےلئے جاﺅں گا۔انہوں نے کہا کہ پی ٹی آئی کا ہرفیصلہ ہی ناقص رہا۔ مجھے پہلے پارٹی سے نکالا اور پھر گالیاں بھی دی گئیں۔

(جاری ہے)

پاکستان تحریک انصاف کوغلط اوربدنیتی پرمبنی فیصلوں سے پاک کرنا ہوگا۔

بانی پی ٹی آئی عمران خان کوجیل میں رکھنے سے استحکام نہیں آئےگا۔خیال رہے کہ اس سے قبل بھی رکن قومی اسمبلی شیر افضل مروت کا کہنا تھا کہ سب لوگ قیادت کے کمپرومائز ہونے کا واویلا کر رہے تھے مگر حقیقت یہ ہے کہ قیادت بد نیتی پر فیصلے کر رہی تھی۔ شیر افضل مروت کی پی ٹی آئی کی موجودہ قیادت اور صوبائی قیادت پر شدید تنقید کی تھی۔ پشاور ہائیکورٹ کے باہر میڈیا سے گفتگو کرتے ہوئے انہوں نے کہا تھاکہ ہم عدالتوں کے چکر لگاتے لگاتے تھک چکے ہیں مگر صوبائی حکومت کا حال یہ ہے کہ کسی فیصلے پر نہیں پہنچتی صرف کیسز چل رہے تھے۔

نااہل اور بزدل لوگوں کو پارٹی کی باگ ڈور دی گئی تھی یہی وجہ ہے کہ ہمارے تمام احتجاجی اقدامات ناکامی کا شکار ہوئے تھے۔ شیرافضل مروت نے خیبرپختونخوا ہ حکومت کو سخت تنقید کا نشانہ بناتے ہوئے کہا تھاکہ صوبائی حکومت کی ہر طرف کوتاہی ہی کوتاہی تھی۔ ایڈووکیٹ جنرل خیبرپختونخوا ہ کو اس صورتحال پر سنجیدگی سے سوچنا چاہیے۔ان کا کہنا تھا کہ ہم ڈیڑھ سال سے ہائی کورٹ کے چکر کاٹ رہے ہیں مگر ضمانتیں نہیں ہو رہی ہیں۔

شیر افضل مروت نے پی ٹی آئی چیئرمین پر بھی شدید تحفظات کا اظہار کیاتھا۔ پی ٹی آئی چیئرمین نے پارلیمانی کمیٹی کی بے توقیری کی تھی۔ انہوں نے جو الزامات لگائے ہیں ان پر آرمی چیف کو نوٹس لینا چاہیے۔ ایسے افراد پی ٹی اے کے چیئرمین جیسے اہم عہدے کیلئے نااہل ہیں۔شیر افضل مروت نے ایمل ولی خان کے موقف کی حمایت کرتے ہوئے کہا کہ ایمل ولی کے ساتھ ذاتی اختلافات اپنی جگہ لیکن چیرمین پی ٹی اے کو عہدے سے ہٹانے کے ان کے مطالبے کی مکمل تائید کی تھی۔شیر افضل مروت نے گفتگو کرتے ہوئے مزید کہا کہ بانی پی ٹی آئی کی رہائی کیلئے احتجاجی تحریک صرف اہل قیادت ہی چلا سکتی ہے یہ موجودہ قیادت کے بس کی بات نہیں تھی۔