بسوں ، ٹرکوں اورسی بی یو کی درآمدات میں جاری مالی سال کے دوران اضافہ

پیر 26 مئی 2025 13:39

اسلام آباد (اُردو پوائنٹ اخبارتازہ ترین - اے پی پی۔ 26 مئی2025ء) بسوں ، ٹرکوں اور دیگر بھاری گاڑیوں کے مکمل تیار یونٹس (سی بی یو ) کی درآمدات میں جاری مالی سال کے دوران بالترتیب 88.88 ، 10.14 اور 57 فیصد اضافہ ہوا ہے ۔ ادارہ برائے شماریات پاکستان (پی بی ایس)کے اعدادوشمار کے مطابق رواں مالی سال کے پہلے 10 ماہ میں جولائی 2024 تا اپریل 2025 کے دوران بسوں ، ٹرکوں اور دیگر بھاری گاڑیوں کے مکمل تیار یونٹس کی درآمدات 85 ملین ڈالر ، 228 ملین ڈالر اور 2.1 ملین ڈالر تک پہنچ گئیں جبکہ گذشتہ مالی سال کے اسی عرصہ کے دوران درآمدات کاحجم بالترتیب 45 ملین ڈالر، 207 ملین ڈالر اور 1.33 ملین ڈالر رہا تھا ۔

اس طرح گذشتہ مالی سال کے مقابلہ میں رواں مالی سال کے پہلے 10 ماہ میں بسوں ، ٹرکوں اور دیگر بھاری گاڑیوں کے سی بی یو کی درآمدات میں 88.88 ، 10.14 اور 57 فیصد کا اضافہ ریکارڈ کیا گیا ہے ۔

(جاری ہے)

پی بی ایس کی رپورٹ کے اسی طرح بھاری گاڑیوں ، کاروں اور موٹرسائیکلز کے مکمل اور جزوی طور پر مکمل کٹس (سی کےڈی /ایس کے ڈی ) کی درآمدات بھی 141 فیصد ، 37 فیصد اور 11 فیصد کے اضافہ سے رواں مالی سال میں 303 ملین ڈالر، 818 ملین ڈالر اور 38 ملین ڈالر تک بڑھ گئیں ۔ مزید برآں رواں مالی سال کے پہلے 9 ماہ میں استعمال شدہ درآمدات گاڑیوں کی درآمدات 6 فیصد کی بڑھوتری سے 27 ہزار 859 یونٹس کے مقابلہ میں 29 ہزار 590 یونٹس تک پہنچ گئیں ۔