پنجاب کے 12 اضلاع سے پولیس کا کروڑوں روپے مالیت کا اسلحہ غائب ہونے کا انکشاف

سب سے زیادہ اسلحہ اور بارود ڈی پی او مظفرگڑھ کے دفتر سے غائب ہوا؛ پنجاب اسمبلی میں آڈٹ رپورٹ پیش

ساجد علی منگل 27 مئی 2025 15:41

لاہور ( اُردو پوائنٹ اخبارتازہ ترین۔ 27 مئی 2025ء ) صوبہ پنجاب کے 12 اضلاع سے پولیس کا کروڑوں روپے مالیت کا اسلحہ غائب ہونے کا انکشاف سامنے اگیا۔ میڈیا رپورٹس کے مطابق پنجاب اسمبلی میں پیش کی گئی محکمہ داخلہ پنجاب کی آڈٹ رپورٹ میں اس حوالے سے حیرت انگیز انکشافات سامنے آئے ہیں، جن سے پتا چلا ہے کہ صوبے کے 12 اضلاع کی پولیس کا کروڑوں روپے مالیت کا اسلحہ اور بارود غائب ہو چکا ہے، اس حوالے سے محکمہ داخلہ پنجاب میں اسلحہ کی چوری، غائب یا عدم ریکوری کے واقعات رپورٹ کیے گئے ہیں۔

سال 2021ء سے 2024ء تک کی آڈٹ رپورٹ میں بتایا گیا ہے کہ مجموعی طور پر 24 کروڑ 55 لاکھ روپے سے زائد مالیت کا اسلحہ غائب ہوا ہے، ڈی پی او مظفرگڑھ کے دفتر سے 8 کروڑ 34 لاکھ روپے مالیت کا اسلحہ اور بارود غائب ہوا، آڈت رپورٹ میں ڈی آئی جی آپریشنز لاہور کے دفتر سے 4 کروڑ 71 لاکھ روپے مالیت کا اسلحہ اور گولیاں غائب ہونے کی نشاندہی کی گئی ہے۔

(جاری ہے)

معلوم ہوا ہے کہ پولیس آفس لاہور سے 4 کروڑ 68 لاکھ روپے مالیت کے غائب شدہ اسلحہ کی تاحال کوئی ریکوری نہیں ہوئی، سی پی او ملتان کے دفتر سے 74 لاکھ روپے مالیت کی رائفلیں اور گولہ بارود غائب ہوا، اس کے علاوہ 2009ء میں سنٹرل جیل لاہور کے افسران کو دی گئی رائفلوں کا ریکارڈ بھی موجود نہیں ہے، اسی طرح ڈی پی او سیالکوٹ کے دفتر سے 56 لاکھ 14 ہزار روپے مالیت کا اسلحہ غائب پایا گیا۔

بتایا جارہا ہے کہ آڈٹ رپورٹ میں ڈی پی او ساہیوال کے دفتر سے 43 لاکھ روپے، ڈی پی او اوکاڑہ سے 38 لاکھ روپے سے زائد، ڈی پی او گجرات سے 35 لاکھ اور ڈی پی او فیصل آباد سے 26 لاکھ روپے سے زائد مالیت کا اسلحہ غائب ہونے کی تصدیق کی گئی ہے، آڈٹ رپورٹ میں اس سنگین صورتحال پر تشویش کا اظہار کیا گیا اور متعلقہ اداروں سے فوری کارروائی کا مطالبہ بھی کیا گیا۔