عالمی مارکیٹ میں تیل کی قیمت میں نمایاں کمی کے باوجود پٹرول کی قیمت میں توقع سے کم کمی

حکومت کی جانب سے عوام کو مکمل ریلیف دینے سے گریز، آئندہ 15 دنوں کیلئے ڈیزل بھی مہنگا کر دیا گیا

محمد علی جمعرات 31 جولائی 2025 23:57

لاہور (اُردو پوائنٹ اخبارتازہ ترین۔ 31 جولائی2025ء) عالمی مارکیٹ میں تیل کی قیمت میں نمایاں کمی کے باوجود پٹرول کی قیمت میں توقع سے کم کمی، حکومت کی جانب سے عوام کو مکمل ریلیف دینے سے گریز، آئندہ 15 دنوں کیلئے ڈیزل بھی مہنگا کر دیا گیا۔ تفصیلات کے مطابق وفاقی حکومت نے اگلے 15 دنوں کیلئے پٹرول سستا جبک ڈیزل مہنگا کر دیا۔ یکم اگست سے 15 اگست تک کیلئے پٹرول کی فی لیٹر قیمت میں 7 روپے 54 پیسے کی کمی سے 264 روپے 61 پیسے مقرر کر دی گئی۔

جبکہ ڈیزل کی قیمت 1 روپے 48 پیسے اضافے سے 285 روپے 83 پیسے مقرر کر دی گئی۔ واضح رہے کہ رواں ماہ کے دوران 2 مرتبہ پٹرولیم مصنوعات کی قیمتوں میں بڑا اضافہ ہونے کے بعد اگلے ماہ کے آغاز سے پٹرول اور ڈیزل سستا ہونے کا امکان ظاہر کیا جا رہا تھا۔

(جاری ہے)

میڈیا رپورٹس میں دعوٰی کیا گیا کہ یکم اگست سے ملک میں پٹرولیم مصنوعات کی قیمتوں میں بڑی کمی ہو سکتی ہے۔

بتایا گیا کہ عالمی مارکیٹ میں تیل کی قیمتوں میں نمایاں کمی ہوئی، جس کے بعد یکم اگست سے پاکستان میں بھی پٹرولیم مصنوعات سستی کرنے پر غور کیا جا رہا ہے۔ یکم اگست سے پٹرول 9 روپے سے زائد جبکہ ڈیزل بھی 3 روپے سے زائد سستا ہونے کا امکان ظاہر کیا گیا۔ بتایا گیا کہ پٹرول کی ایکس ریفائنری قیمت میں 9 روپے7 پیسے اور ڈیزل کی ایکس ریفائنری قیمت میں3 روپے73پیسے کمی ریکارڈ ہوئی ہے۔

پٹرول کی ایکس ریفائنری قیمت 168روپے 73پیسے سے کم ہوکر 159روپے 66 پیسے ہو گئی ہے۔ اس کے علاوہ عالمی مارکیٹ میں پٹرول کی فی بیرل قیمت75.27ڈالر سے کم ہو کر73.19 ڈالر پر آگئی جبکہ پیٹرولیم پر فی بیرل پریمیم 9.61ڈالر سے کم ہو کر6.74 ڈالر پر آگیا، کسٹمز ڈیوٹی بھی 15روپے 33 پیسے سے کم ہو کر 14روپے 29 پیسے پر آگئی۔ تاہم حکومت نے پٹرول 9 روپے سستا کرنے کے بجائے 7 روپے سستا کیا، جبکہ ڈیزل سستا کرنے کے بجائے مزید مہنگا کر دیا گیا۔