محنت کشوں کیلئے محفوظ اور باوقار حالات فراہم کرنا وقت کی اہم ضرورت ہے،لیبر کانفرنس سے مقررین کا خطاب

لاہور (اُردو پوائنٹ اخبارتازہ ترین - اے پی پی۔ 27 مئی2025ء) فریڈرک ایبرٹ اسٹفٹنگ (ایف ای ایس) پاکستان کے زیر اہتمام چوتھی قومی لیبر کانفرنس لاہور میں منعقد ہوئی، جس میں پاکستان میں مزدوروں کے حقوق کی صورتحال، چیلنجز اور ان کے حل پر تبادلہ خیال کیا گیا۔ کانفرنس کا آغاز ایف ای ایس پاکستان کے کنٹری ڈائریکٹر فیلکس کولبٹز کے خیر مقدمی کلمات سے ہوا، جب کہ پروگرام ایڈوائزر عبداللہ دایو نے کانفرنس کے اغراض و مقاصد کا خاکہ پیش کیا۔

افتتاحی سیشن میں لیبر ایجوکیشن فاونڈیشن کے ایگزیکٹو ڈائریکٹر خالد محمود نے پاکستان میں مزدور تحریک کی موجودہ صورتحال پر روشنی ڈالی۔ انہوں نے بتایا کہ ملک کی 74.2 ملین لیبر فورس میں سے صرف 1% مزدور ٹریڈ یونینوں میں منظم ہیں۔ اجلاس کی صدارت نیشنل انڈسٹریل ریلیشن کمیشن (این آئی آر سی) کے چیئرمین جسٹس (ر) شوکت عزیز صدیقی نے کی۔

(جاری ہے)

کانفرنس میں اعلی لیبر عدلیہ، سرکاری محکموں، ٹریڈ یونینز، سول سوسائٹی اور مختلف شعبوں سے وابستہ اسٹیک ہولڈرز نے شرکت کی۔

مزدور رہنمائوں شمس الرحمان سواتی، چوہدری محمد یسین، خورشید احمد، عبداللطیف نظامانی اور سلطان لالہ نے پاکستان میں محنت کشوں کے محفوظ حالات، منصفانہ اجرت اور سماجی انصاف کی ضرورت پر زور دیا۔انہوں نے حکومت سے مطالبہ کیا کہ وہ آئندہ ماہ جنیوا میں منعقد ہونے والی انٹرنیشنل لیبر کانفرنس سمیت عالمی سطح پر پاکستانی محنت کشوں کی منصفانہ نمائندگی کو یقینی بنائے۔

مزدور قیادت نے نجکاری، بڑھتی مہنگائی اور مزدور تحریک کو لاحق خطرات سے نمٹنے کے لیے قومی اتحاد بنانے پر بھی اتفاق کیا۔اختتامی سیشن میں جسٹس (ر) شوکت عزیز صدیقی نے این آئی آر سی کے کردار اور محنت کشوں کے حقوق کے تحفظ میں اس کی اہمیت پر روشنی ڈالی۔ انہوں نے کہا کہ مزدور تحریک کو کرپٹ عناصر سے پاک کرنا اور محنت کشوں کے لیے محفوظ اور باوقار حالات فراہم کرنا وقت کی اہم ضرورت ہے۔

جسٹس (ر) عبدالرسول میمن نے کہا کہ این آئی آر سی آجر اور ملازمین کے درمیان پل کا کردار ادا کرتا ہے اور باہمی اعتماد کو فروغ دیتا ہے۔ محترمہ ام لیلیٰ چیئرپرسن نیشنل کمیشن آن سٹیٹس آف ویمن نے نشاندہی کی کہ ملک میں خواتین لیبر فورس کا حصہ صرف 24% ہے، حالانکہ وہ آبادی کا 50% ہیں۔ انہوں نے لیبر قوانین کو عالمی معیارات کے مطابق بنانے پر زور دیا۔

ویمن ورکرز آرگنائزیشن کی آئمہ محمود نے کہا کہ خواتین کی ٹریڈ یونین میں شرکت محدود ہے اور انہیں فیصلہ سازی کا حصہ بنایا جانا چاہیے۔ کانفرنس میں خورشید احمد نے مزدوروں کے تحفظات دور کرنے کے لیے ٹھوس اقدامات کی ضرورت پر زور دیا۔کانفرنس میں ناصر منصور، شاہد وحید، محمد نسیم را، محسن الیاس، زہرا خان اور عبدالرحمٰن عاصی سمیت ممتاز مزدور رہنمائوں نے شرکت کی۔کانفرنس کا اختتام اس عزم کے ساتھ ہوا کہ مزدور قیادت اور انتظامیہ کو مل کر نہ صرف تنازعات کا حل نکالنا ہوگا بلکہ سماجی انصاف اور باہمی احترام کی بنیاد پر مزدوروں کے حالات بہتر بنانے ہوں گے۔ شرکا ءنے نیشنل الائنس فار سوشل جسٹس کے قیام اور آئندہ ایسے مزید مذاکروں کے انعقاد پر اتفاق کیا۔