بھارت توسیع پسندانہ عزائم کا اظہار کر رہا ہے،جوہری خطے میں طبل جنگ بجانا غیر ذمہ دارانہ فعل ہے، پاکستانی سفیر

بھارتی قیادت کی اشتعال پسندی کا مقصد انتظامی خامیوں کی پردہ پوشی ہے، پاک بھارت کشیدگی میں کمی اور سیزفائر کے قیام میں امریکی قیادت نے اہم کردار ادا کیا،رضوان سعید شیخ کی میڈیا سے گفتگو

فیصل علوی بدھ 28 مئی 2025 11:15

بھارت توسیع پسندانہ عزائم کا اظہار کر رہا ہے،جوہری خطے میں طبل جنگ ..

واشنگٹن(اردوپوائنٹ اخبار تازہ ترین۔28 مئی 2025) امریکہ میں پاکستانی سفیر رضوان سعید شیخ نے کہا کہ بھارت توسیع پسندانہ عزائم کا اظہار کر رہا ہے،جوہری خطے میں طبل جنگ بجانا غیر ذمہ دارانہ فعل ہے،پاک بھارت کشیدگی میں کمی اور سیزفائر کے قیام میں امریکی قیادت نے اہم کردار ادا کیا،امریکہ میں پاکستان کے سفیر رضوان سعید شیخ نے میڈیا سے گفتگو کرتے ہوئے کہاکہ مسئلہ کشمیر جنوبی ایشیا کے عوام کی ترقی کی راہ میں رکاوٹ ہے۔

امریکی قیادت کے بروقت اور موثر کردار سے پاک بھارت جنگ بندی ہوئی۔انہوں نے کہا کہ پاکستان کا اعلیٰ سطحی وفد کے دورے کامقصد جنوبی ایشیا کی بدلتی ہوئی سیاسی و سیکیورٹی صورتحال پر امریکی قیادت کو آگاہ کرنا۔ مسئلہ کشمیر کو عالمی سطح پر مزید اجاگر کرنا اور خطے میں قیامِ امن کیلئے پاکستان کے موقف کو مضبوطی سے پیش کرنا ہے۔

(جاری ہے)

رضوان سعید شیخ کا کہنا تھا کہ پاکستانی وفد کی امریکی انتظامیہ اور کانگریس کے اہم ارکان کے ساتھ تفصیلی ملاقاتیں متوقع ہیں جو نہ صرف دوطرفہ تعلقات میں بہتری لائیں گی بلکہ مسئلہ کشمیر پر پاکستان کے مو¿قف کو عالمی سطح پر مزید نمایاں کریں گی۔

پاک بھارت کشیدگی کے بعد مسئلہ کشمیر ابھر کر دنیا کے سامنے آیا، دنیا کی توجہ کئی دہائیوں سے حل طلب مسئلے کی جانب مبذول ہوئی۔ بھارتی قیادت کی اشتعال پسندی کا مقصد انتظامی خامیوں کی پردہ پوشی ہے۔پاکستانی سفیر نے بھارت کے موجودہ طرز عمل پر شدید تحفظات کا اظہار کرتے ہوئے کہا کہ بھارتی حکومت داخلی و خارجی پالیسیوں میں ہندوتوا کے انتہا پسند اور دہشت گردانہ نظریے پر عمل پیرا ہے۔

انہوں نے کہا کہ بھارت کی سیاسی قیادت مسلسل توسیع پسندانہ اور تسلط پسندانہ عزائم کا کھلم کھلا اظہار کر رہی ہے۔پاکستانی سفیر رضوان سعید شیخ کا مزید کہنا تھا کہ پاکستان امن کا داعی ہے لیکن اپنی خودمختاری، سلامتی اور کشمیری عوام کے حقوق پر کوئی سمجھوتہ نہیں کرے گا۔ پاکستانی وفد کا یہ دورہ عالمی سطح پر پاکستان کی موثر سفارتکاری اور مسئلہ کشمیر کیلئے جاری کوششوں کا تسلسل ہے جس سے سفارتی محاذ پر مثبت نتائج کی امید کی جا رہی ہے۔

ان کا یہ بھی کہنا تھا کہ بھارتی قیادت کی اشتعال انگیز کارروائیوں اور بیانات کا مقصد اندرونی سیاسی ناکامیوں اور انتظامی بحرانوں سے توجہ ہٹانا ہے۔ انہوں نے خبردار کیا کہ جوہری صلاحیت کے حامل اس حساس خطے میں بلا جواز طبل جنگ بجانا کسی طور بھی ایک ذمہ دارانہ اقدام نہیں ہو سکتا۔پاکستانی سفیر نے عالمی برادری، خاص طور پر امریکا پر زور دیا کہ وہ خطے میں پائیدار امن کے قیام اور کشمیری عوام کو ان کا حقِ خودارادیت دلانے میں اپنا کردار ادا کرے۔