پاکستان اٹامک انرجی کمیشن کا امن، ترقی اور خوشحالی کیلئے جوہری ٹیکنالوجی کے استعمال کے غیر متزلزل عزم کا اعادہ

28 مئی 1998ءکے دن کودفاعی خودمختاری کی علامت قرار دیدیا،پاکستان اٹامک انرجی کمیشن قومی ترقی، معیارِ زندگی بہتر بنانے، صنعتوں کو توانائی فراہم کرنے اور پائیدار ترقی کے فروغ میں اپنا کلیدی کردار جاری رکھے گا، اعلامیہ

فیصل علوی بدھ 28 مئی 2025 15:55

پاکستان اٹامک انرجی کمیشن کا امن، ترقی اور خوشحالی کیلئے جوہری ٹیکنالوجی ..

اسلام آباد(اردوپوائنٹ اخبار تازہ ترین۔28 مئی 2025)پاکستان اٹامک انرجی کمیشن کا یوم تکبیر پر پاکستان میں امن، ترقی اور خوشحالی کیلئے جوہری ٹیکنالوجی کے استعمال کے غیر متزلزل عزم کا اعادہ ، پاکستان اٹامک انرجی کمیشن نے 28 مئی 1998 کو حاصل کی گئی جوہری صلاحیت کی یاد کو تازہ کرتے ہوئے اس دن کو نہ صرف دفاعی خودمختاری کی علامت قرار دیا ،یوم تکبیر کے حوالے سے جاری کردہ اعلامیے کے مطابق پاکستان اٹامک انرجی کمیشن، قومی ترقی، معیارِ زندگی بہتر بنانے، صنعتوں کو توانائی فراہم کرنے اور پائیدار ترقی کے فروغ میں اپنا کلیدی کردار جاری رکھے گا۔

پاکستان اٹامک انرجی کمیشن نے قومی ترقی، صحت، توانائی اور زراعت میں جوہری ٹیکنالوجی کے پرامن استعمال کے حوالے سے پاکستان کی نمایاں پیش رفت کو بھی اجاگر کیا ہے۔

(جاری ہے)

جاری کردہ اعلامیے کے مطابق پاکستان اٹامک انرجی کمیشن، ملک کا معتبر جوہری ادارہ ہونے کے ناطے، فلاح عامہ کیلئے نیوکلیئر سائنس سے مستفید ہونے کی کوششیں جاری رکھے ہوئے ہے۔

توانائی کے شعبے میں کمیشن کے چھ جوہری پاور پلانٹس قومی گرڈ کو کم لاگت، صاف اور پائیدار بجلی فراہم کر رہے ہیں۔ چشمہ نیوکلیئر پاور پلانٹ یونٹ-1 (سی-1) نے حال ہی میں 400 دن تک مسلسل بجلی پیدا کر کے قومی ریکارڈ قائم کیا ہے جبکہ زیر تعمیر چشمہ یونٹ-5 (سی-5) آپریشنل ہونے پر 1,200 میگاواٹ بجلی فراہم کرے گا۔اسی طرح زراعت اور بائیو ٹیکنالوجی میں کمیشن کے تحقیقی ادارے بیماریوں سے مزاحم اور زیادہ پیداوار والی فصلوں کی تیاری میں مصروف ہیں۔

فیصل آباد کا نیوکلیئر انسٹی ٹیوٹ فار ایگریکلچر اینڈ بائیولوجی (نیاب) ماحول دوست رنگین کپاس تیار کر رہا ہے اور انٹرنیشنل اٹامک انرجی ایجنسی کا معاون مرکز بھی قرار پایا ہے۔پاکستان اٹامک انرجی کمیشن ملک بھر میں قائم کینسر کے 20 ہسپتالوں کا نیٹ ورک بھی چلا رہا ہے جو تشخیص و علاج کی جدید سہولیات فراہم کررہا ہے۔ لینئر ایکسلریٹر اور پیٹ سکینرز جیسی جدید ٹیکنالوجی سے آراستہ یہ مراکز 80 فیصد سے زائد کینسر کے مریضوں کو علاج فراہم کر رہے ہیں۔ خاص طور پر اسلام آباد کا نوری کینسر ہسپتال، جدید ترین روبوٹک ریڈیو سرجری کی سائبر نائف ٹیکنالوجی سے لیس ہے۔