سپریم کورٹ کے آئینی بنچ نے اسلام آباد ہائیکورٹ ججز ٹرانسفر و سنیارٹی کیس کی سماعت 16 جون تک ملتوی کردی

اسلام آباد (اُردو پوائنٹ اخبارتازہ ترین - اے پی پی۔ 29 مئی2025ء) سپریم کورٹ کے آئینی بنچ نے اسلام آباد ہائیکورٹ ججز ٹرانسفر و سنیارٹی کیس کی سماعت 16 جون تک ملتوی کر دی۔کیس کی سماعت جمعرات کو جسٹس محمد علی مظہر کی سربراہی میں پانچ رکنی آئینی بنچ نے کی،درخواست گزار ججز کے وکیل صلاح الدین کے جواب الجواب دلائل کی عدم تکمیل پر سماعت ملتوی کی گئی ۔

وکیل صلاح الدین نے اپنے دلائل میں موقف اختیار کیا کہ کسی جج کے تبادلے سے متعلق آئینی نکات واضح ہیں اور مستقل ٹرانسفر کی صورت میں آرٹیکل 175 اے غیر موثر ہو جائے گا، ماضی میں کسی جج کا ایک ہائیکورٹ سے دوسری ہائیکورٹ میں مستقل تبادلے کی کوئی مثال موجود نہیں ہے اور آرٹیکل 200 کے تحت صرف عبوری ٹرانسفر کی اجازت دی گئی ہے۔

(جاری ہے)

صلاح الدین نے مزید کہا کہ مستقل تقرری کا اختیار صرف جوڈیشل کمیشن کے پاس ہے اور آرٹیکل 175 اے کے تحت نئی تقرری ہی ممکن ہے، تقرری اور تبادلہ دو الگ الگ مفہوم رکھتے ہیں، جج کے تبادلے کے لیے با معنی مشاورت ضروری ہے ۔

انہوں نے عدالت کو بتایا کہ اسلام آباد ایکٹ کے سیکشن 3 میں تقرری کی بات کی گئی ہے جب کہ ٹرانسفر کا ذکر تک موجود نہیں ہے، انہوں نے جوڈیشل کمیشن رول 6 کا حوالہ دیتے ہوئے کہا کہ اس میں ریجن کا لفظ استعمال کیا گیا ہے۔جسٹس محمد علی مظہر نے ریمارکس دیئے کہ اس کیس میں عدالت کے سامنے آئینی و قانونی نقطہ کی تشریح کا معاملہ ہے، تبادلے کے معاملے میں تین چیف جسٹسز شامل تھے، ہر چیز ایگزیکٹو کے ہاتھ میں نہیں تھی، تبادلے پر جج سے رضامندی بھی لی جاتی ہے اور آرٹیکل 175 اے کے تحت نئی تقرری ہوسکتی ہے۔

اٹارنی جنرل نے کہا کہ جوڈیشل کمیشن کی میٹنگ کے منٹس عدالت کے پاس موجود ہیں جنہیں دیکھا جا سکتا ہے۔جسٹس محمد علی مظہر نے کہا کہ یہ فرسٹ ایمپریشن کا کیس ہے اور ہمیں مستقبل کے لیے اس مقدمے کا فیصلہ کرنا ہے، وکیل صلاح الدین نے کہا کہ پہلے رائونڈ میں بھی انہوں نے یہی موقف اختیار کیا تھا کہ جوڈیشل کمیشن نے اس معاملے پر غور ہی نہیں کیا، جہاں قانون خاموش ہے، وہاں لازمی شقوں کا اضافہ نہیں کیا جا سکتا۔جسٹس نعیم اختر افغان نے ریمارکس دیئے کہ تبادلے کا اختیار تو صدر پاکستان کا ہے، ججز کے ٹرانسفر کا عمل تو وزارت قانون نے شروع کیا۔درخواست گزار ججز کے وکیل صلاح الدین کے جواب الجواب دلائل کی عدم تکمیل پر کیس کی سماعت 16 جون تک ملتوی کر دی گئی ۔