ملک بھر میں انسداد اسمگلنگ آپریشنز،کروڑوں روپے مالیت کی منشیات پکڑی گئی

6 مختلف کارروائیوں میں 60.229 کلوگرام منشیات ضبط کرکے 4 ملزمان کو گرفتار کر لیا گیا

جمعہ 30 مئی 2025 13:29

راولپنڈی(اُردو پوائنٹ اخبارتازہ ترین - این این آئی۔ 30 مئی2025ء)اے این ایف نے ملک بھر میں انسداد سمگلنگ آپریشنز کے دوران کروڑوں روپے مالیت کی منشیات برآمد کرلی۔ترجمان کے مطابق اے این ایف نے ملک کے مختلف شہروں میں منشیات اسمگلنگ کے خلاف کامیاب کارروائیاں کرتے ہوئے کروڑوں روپے مالیت کی منشیات برآمد کر لی۔6 مختلف کارروائیوں میں مجموعی طور پر 60.229 کلوگرام منشیات ضبط کی گئیں جن کی مالیت 4 کروڑ 4 لاکھ روپے سے زائد بتائی گئی ہے، جبکہ 4 ملزمان کو گرفتار کر لیا گیا۔

منشیات کے خلاف یہ کریک ڈاؤن خصوصی طور پر تعلیمی اداروں کے اطراف اور حساس مقامات پر کیا گیا۔کوئٹہ کے علاقے بلیلی روڈ پر واقع ایک یونیورسٹی کے قریب کارروائی کے دوران ایک مشتبہ ملزم کے قبضے سے 2 کلوگرام چرس برآمد ہوئی۔

(جاری ہے)

ابتدائی تفتیش میں گرفتار ملزم نے انکشاف کیا ہے کہ وہ تعلیمی ادارے کے طلبا کو منشیات فروخت کرتا تھا۔اے این ایف کی دیگر کارروائیاں بھی انتہائی مؤثر رہیں۔

لاہور میں کالا شاہ کاکو ٹول پلازہ، شیخوپورہ کے قریب ایک گاڑی سے 24 کلوگرام چرس برآمد کی گئی اور ملزم کو گرفتار کر لیا گیا۔ حیدرآباد میں گیڈو چوک کے قریب ایک مسافر بس میں سوار ملزم کے قبضے سے 3.6 کلوگرام چرس برآمد ہوئی جب کہ اسی شہر میں ایک اور کارروائی میں بھی اتنی ہی مقدار میں چرس برآمد کی گئی۔علاوہ ازیں لاہور کے ایک کارگو آفس میں کراچی بھیجے جانے والے پارسل کی تلاشی کے دوران 17 گرام کوکین اور 12 گرام وزنی 20 ایکسٹیسی گولیاں برآمد ہوئیں۔

اٴْدھر بلوچستان کے علاقے سونمیانی، ضلع حب میں جھاڑیوں کے درمیان سمگلنگ کیلئے چھپائی گئی 27 کلوگرام ہیروئن بھی برآمد کی گئی۔اے این ایف کے مطابق گرفتار ملزمان کے خلاف انسداد منشیات ایکٹ کے تحت مقدمات درج کر کے مزید تحقیقات کا آغاز کر دیا گیا ہے۔ منشیات فروشوں کے خلاف کارروائیاں بلا امتیاز جاری رہیں گی، خصوصاً تعلیمی اداروں کو نشانہ بنانے والے عناصر کے خلاف سخت کارروائی عمل میں لائی جائے گی۔