Live Updates

پاکستان کو ایک سبز انقلاب کی ضرورت ہے،بلاول بھٹوزرداری

ماحول کے تحفظ اور آئندہ نسلوں کے لیے زمین کو محفوظ بنانے کے لیے فوری و اجتماعی اقدامات کیے جائیں،عالمی یوم ماحولیات پر پیغام

جمعرات 5 جون 2025 22:17

پاکستان کو ایک سبز انقلاب کی ضرورت ہے،بلاول بھٹوزرداری

کراچی (اُردو پوائنٹ اخبارتازہ ترین - این این آئی۔ 05 جون2025ء)پاکستان پیپلزپارٹی کے چیئرمین بلاول بھٹو زرداری نے کہا ہے کہ پاکستان کو ایک سبز انقلاب کی ضرورت ہے۔ایسا سبز انقلاب جو صرف زراعت تک محدود نہ ہو بلکہ سوچ، گورننس اور ہماری روزمرہ زندگیوں میں بھی شامل ہو۔ماحول کے تحفظ اور آئندہ نسلوں کے لیے زمین کو محفوظ بنانے کے لیے فوری و اجتماعی اقدامات کیے جائیں ۔

عالمی یوم ماحولیات پراپنے پیغام میں بلاول بھٹو زرداری نے کہا کہ پاکستان کا کاربن کے اخراج میں ایک فیصد سے بھی کم حصہ ہے مگر موسمیاتی تبدیلی کے بدترین اثرات کا شکار ہے۔پاکستان دنیا سے اپنے عوام کے لیے موسمیاتی انصاف چاہتا ہے۔جو کرہِ ارض کو آلودہ کرتے ہیں انہیں ان لوگوں کو حساب دینا ہوگا جو ماحولیاتی تباہی کوجھیلتے ہیں۔

(جاری ہے)

انہوںنے کہا کہ ہم ماحولیات کے عالمی دن پر شہید محترمہ بینظیر بھٹو کی بصیرت کو خراج عقیدت پیش کرتے ہیں۔

بی بی شہید نے ماحول دوست سوچ کو اس وقت قومی ترجیح بنایا جب دنیا اس حوالے سے ابتدائی مراحل میں تھی۔بی بی شہید کا ویژن آج بھی ہماری توانائی کی پالیسی، جنگلات کے تحفظ اور آبی وسائل کی بقا کے عزم میں زندہ ہے۔انسانوں کی غفلت، لالچ اور بے حسی کے سبب زمین کو پہنچنے والے گہرے زخموں کے علاج کا سوچنا ہوگا۔ہم جس ہوا میں سانس لیتے ہیں، جو پانی پیتے ہیں اور جس زمین پر بستے ہیں، وہ سب پکار رہے ہیں۔انہوںنے کہا کہ نوجوان آنے والے کل کے نگہبان ہیں، اپنی آواز، اپنا ووٹ اور اپنا وژن کا استعمال کریں۔نوجوان اپنی آواز، اپنا ووٹ اور اپنا وژن کو بروئے کار لاکر ایک صحت مند زمین کا مطالبہ کریں۔انہوںنے اپیل کی کہ آئیی! ہم سب زندگی کا انتخاب کریں، زمین کا انتخاب کریں۔