Live Updates

صوبے میں پولیس اور دیگر قانون نافذ کرنے والے اداروں کو مضبوط بنایا جائے گا، ملک لیاقت خان

جمعہ 30 مئی 2025 20:20

پشاور (اُردو پوائنٹ اخبارتازہ ترین - اے پی پی۔ 30 مئی2025ء) وزیراعلیٰ خیبر پختونخوا کے معاون خصوصی برائے بہبود آبادی ملک لیاقت خان نے انسپکٹر جنرل پولیس خیبر پختونخوا ذولفقار حمید سے انکے دفتر میں جمعہ کو ملاقات کی۔ملاقات میں صوبہ بھر اور بالخصوص دیر ملاکنڈ میں امن و امان کی صورتحال پر تفصیلی گفتگو ہوئی۔

(جاری ہے)

معاون خصوصی نے دہشت گردی کیخلاف جنگ میں پولیس کی قربانیوں کو سراہا اور صوبائی حکومت کی جانب سے پولیس فورس کو مزید مظبوط بنانے کے عزم کا اعادہ کیا۔

اس موقع پر معاون خصوصی ملک لیاقت نے کہا کہ امن وامان صوبائی حکومت کی ترجیحات میں سر فہرست ہے، صوبے میں پولیس اور دیگر قانون نافذ کرنے والے اداروں کو مضبوط بنایا جائے گا، خیبر پختونخوا دہشت گردی کے خلاف جنگ میں فرنٹ لائن صوبہ ہے۔ آئی جی ذوالفقار حمید نے کہا کہ لوگوں کے جان و مال کے تحفظ کو یقینی بنانا اولین مقصد ہے۔انہوں نے دہشت گردی میں ملوث عناصر کو کیفر کردار تک پہنچانے اور دہشتگردی کو ختم کرنے کے عزم کا اظہار کیا۔