سندھ ہائی کورٹ نے قتل کیس کے ملزم کی درخواست ضمانت کی سماعت غیر معینہ مدت تک کیلئے ملتوی کردی

ہفتہ 31 مئی 2025 15:45

کراچی (اُردو پوائنٹ اخبارتازہ ترین - این این آئی۔ 31 مئی2025ء)سندھ ہائی کورٹ نے قتل کیس کے ملزم کی درخواست ضمانت کی سماعت غیر معینہ مدت تک کے لیے ملتوی کردی ہے ۔سندھ ہائیکورٹ میں قتل کیس کے ملزم کی درخواست ضمانت کی سماعت ہوئی۔ ملزم آفتاب اور اس کا وکیل عدالت میں پیش نہیں ہوئے۔ عدالت نے مکمل یونیفارم میں پیشی پر پولیس افسر کی تعریف کی۔ جسٹس عمر سیال نے پولیس افسر سے استفسار کیا کہ آپ کا تعلق کس فورس سے ہی پولیس افسر نے بتایا کہ میرا تعلق اسپیشل سیکیورٹی یونٹ سے ہے۔

جسٹس عمر سیال نے پوچھا کہ ایس ایس یو کیا کام کرتی ہی پولیس افسر نے کہا کہ ایس ایس یو کا کام اہم شخصیات اور مقامات کی سیکیورٹی فراہم کرنا ہے۔ جسٹس عمر سیال نے سوال کیا کہ کیا آپ کے پاس سراغ رساں کتے بھی ہوتے ہیں پولیس افسر نے کہا کہ جی ہمارے پاس سراغ رساں کتوں کا یونٹ موجود ہے۔

(جاری ہے)

عدالت نے پوچھا کہ سراغ رساں کتوں کی تربیت کیسے کی جاتی ہی پولیس افسر نے کہا کہ تربیت شدہ سراغ رساں کتے بیرون ملک سے لائے جاتے ہیں۔

عدالت نے استفسار کیا کہ سنا ہے منشیات کا سراغ لگانے والے کتوں کو دوبارہ استعمال نہیں کیا جاتا، جو کتا ایک بار منشیات سونگھ لے وہ فوری دوبارہ منشیات سونگھنے کی صلاحیت نہیں رکھتا پولیس افسر نے کہا کہ سراغ رساں کتوں کو کچھ وقت کے لیے آرام دیا جاتا ہے۔ عدالت نے سوال کیا کہ آپ لوگ سراغ رساں کتوں کو کیسے رکھتے ہیں پولیس افسر نے کہا کہ سراغ رساں کتوں کیلئے ایئر کنڈیشنڈ کمرے ہیں، مناسب دیکھ بھال کی جاتی ہے۔ سرکاری وکیل نے موقف دیا کہ ایس ایس یو کے پاس اسکیٹنگ یونٹ بھی موجود ہے۔ فورس کے جوان اسکیٹنگ کرتے ہوئے اسلحہ استعمال کرنے کی مشق کرچکے ہیں۔ عدالت نے پولیس افسر کی تعریف کرتے ہوئے، درخواست کی سماعت غیر معینہ مدت تک ملتوی کردی۔