Live Updates

ملک کو بحرانوں سے نکالنے کا واحد حل اسلامی نظام کا نفاذ ہے‘ اسامہ پسروری

ملک کی معیشت کو فوری طورپر سودی نظام سے نکال کر اسلامی اصولوں کے مطابق استوار کیا جائے

اتوار 1 جون 2025 13:05

لاہور (اُردو پوائنٹ اخبارتازہ ترین - این این آئی۔ 01 جون2025ء) جمعیت علماء اسلام کے رہنما اسامہ پسروری نے کہا کہ پاکستان کا قیام کسی سیکولر نظام کے لیے نہیں ہوا بلکہ اسلام کے عادلانہ، شفاف اور فلاحی نظام کے نفاذ کے لیے ہوا تھا۔ آج ملک جن بحرانوں میں گھرا ہوا ہے، اس کا واحد حل اسلامی نظام کا نفاذ ہے۔ جب تک ملک کو قرآن و سنت کی بنیاد پر چلانے کا عزم نہیں کیا جائے گا، تب تک استحصال، غربت، مہنگائی اور بدامنی کا خاتمہ ممکن نہیں۔

اسامہ پسروری نے حکومت کے حالیہ بجٹ کو تنقید کا نشانہ بناتے ہوئے کہا کہ آئی ایم ایف کے دبا پر بنائے گئے اس بجٹ نے عوامی امیدوں کا خون کر دیا ہے۔ مہنگائی کی چکی میں پسنے والی قوم کو کسی ریلیف کے بجائے مزید بوجھ دے دیا گیا ہے۔ بجٹ میں عام شہری، سرکاری ملازمین اور مزدور طبقے کے لیے کوئی واضح سہارا نظر نہیں آتا۔

(جاری ہے)

انہوں نے کہا کہ نوجوان جو ملک کا اصل سرمایہ اور روشن مستقبل ہیں، آج بدترین ذہنی، تعلیمی اور معاشی دبا کا شکار ہو چکے ہیں۔

انہیں علم، روزگار اور قیادت کے مواقع دینے کے بجائے محض نعروں اور وعدوں میں الجھایا جا رہا ہے۔ یہ رویہ نہ صرف انفرادیت کو مار رہا ہے بلکہ پاکستان کے مستقبل کو اندھی کھائی میں دھکیل رہا ہے۔انہوں نے مطالبہ کیا کہ سرکاری ملازمین، کم آمدنی والے طبقے، اور نوجوانوں کو بجٹ میں ریلیف دیا جائے، اور معیشت کو سودی نظام سے نکال کر اسلامی اصولوں کے مطابق استوار کیا جائے۔ان کا کہنا تھا کہ پاکستان کی حقیقی ترقی کا راستہ کسی مغربی ایجنڈے سے نہیں، بلکہ نظامِ مصطفی ﷺ سے جڑا ہے۔ یہی راستہ ہمیں عزت، غیرت، خودمختاری اور استحکام دے سکتا ہے۔