Live Updates

ارشد ندیم نے ایشین ایتھلیٹکس چمپئن شپ میں فتح کو پاکستان کے نام کردیا

ایتھلیٹ نے اپنے ویڈیو پیغام میں اپنی حمایت اور دعاں کے لیے کا شکریہ بھی ادا کیا

اتوار 1 جون 2025 18:25

لاہور (اُردو پوائنٹ اخبارتازہ ترین - این این آئی۔ 01 جون2025ء) ایشین ایتھلیٹکس چمپئن شپ کے جیولین تھرو فائنل میں گولڈ میڈل جیت کر قوم کا سر فخر سے بلند کرنے والے ارشد ندیم نے اپنی حمایت اور دعائوں کے لیے قوم کا شکریہ ادا کیا اور یہ فتح پاکستان کے نام کی۔انسٹاگرام پر ایک پوسٹ میں ارشد ندیم نے کہا کہ یہ آپ سب کی دعائوں کی وجہ سے ہے کہ اللہ نے مجھے فائنل میں کامیاب کیا اور پاکستان کو عزت دی، جب میں نے ایشین ایتھلیٹکس چمپئن شپ میں گولڈ جیتا۔

انہوں نے کہا کہ یہ آپ سب کی دعائوں اور میری اور میرے کوچ سلمان اقبال بٹ کی محنت کا نتیجہ ہے۔28سالہ ارشد ندیم نے اپنے مختصر ویڈیو پیغام میں مزید کہا کہ مجھے بہت خوشی ہے کہ پیرس اولمپکس کے بعد یہ میرا پہلا مقابلہ تھا، اور اللہ نے پاکستان کو فتح سے ہمکنار کیا۔

(جاری ہے)

واضح رہے کہ ارشد ندیم نے بین الاقوامی مقابلے میں واپسی کی اور جنوبی کوریا میں منعقدہ ایشین ایتھلیٹکس چمپئن شپ میں مردوں کے جیولین تھرو فائنل میں 86.40میٹر کی تھرو کے ساتھ گولڈ میڈل حاصل کیا۔

ایشین ایتھلیٹکس چمپئن شپ میں پاکستان کے لیے 50سالوں میں یہ پہلا گولڈ میڈل بھی ہے۔ایشین ایتھلیٹکس چمپئن شپ ہندوستان کے سچن یادیو نے 85.16میٹر کی تھرو کے ساتھ چاندی اور جاپان کے یوتا ساکیاما نے 83.75میٹر کی تھرو کے ساتھ کانسی کا تمغہ جیتا، یہ دونوں کھلاڑیوں کی ٹورنامنٹ میں بہترین ذاتی کارکردگی بھی تھی۔قبل ازیں ارشد ندیم پیرس میں گذشتہ برس منعقد ہونیو الے اولمپک گیمز میں 92.97میٹر کی زبردست تھرو کے ساتھ گولڈ میڈل جیتا تھا۔ارشد ندیم جلد ہی ستمبر میں ہونے والی ورلڈ ایتھلیٹکس چمپئن شپ کی تیاری کے لیے انگلینڈ جائیں گے، یہ واحد بڑا ٹورنامنٹ ہے جہاں انہوں نے ابھی تک گولڈ میڈل نہیں جیتا ہے۔