Live Updates

عددی برتری کے باوجود بھارت پاکستان کو ڈرا دھمکا نہیں سکتا،چیمبر آف کامرس اینڈانڈسٹری فیصل آباد

منگل 3 جون 2025 17:38

مکوآنہ (اُردو پوائنٹ اخبارتازہ ترین - این این آئی۔ 03 جون2025ء)فیصل آباد چیمبر آف کامرس اینڈانڈسٹری کی ایگزیکٹو کمیٹی نے حالیہ بھارتی حملے کا کامیابی سے جواب دینے پر وزیر اعظم شہباز شریف، چیئرمین جوائنٹ چیفس آف سٹاف کمیٹی جنرل ساحر شمشاد مرزا، چیف آف آرمی سٹاف فیلڈ مارشل عاصم منیر، ائیر چیف مارشل ظہیر بابر سدھو، چیف آف نیول سٹاف ایڈمرل نوید اشرف اور پاکستان کی مسلح افواج کو زبردست خراج تحسین پیش کیا ہے۔

ایگزیکٹو کمیٹی کا اجلاس صدر ریحان نسیم بھراڑہ کی زیر صدارت ہوا جس میں ایگزیکٹو ممبر حاجی محمد عطاء اللہ نے بھارتی حملے کا منہ توڑ جواب دینے اور کامیاب جوابی حملوں میں بھارت کے پانچ طیاروں کے علاوہ ان کے فوجی ٹھکانوں کو تباہ کرنے پر مسلح افواج کی پیشہ وارانہ صلاحیتوں کو سراہنے کیلئے قرار داد پیش کی۔

(جاری ہے)

جس کو ہاؤس نے متفقہ طور پر منظور کر لیا۔

قرارداد میں کہا گیا ہے کہ وزیر اعظم شہباز شریف کی جراتمندانہ قیادت اور چیف آف آرمی سٹاف فیلڈ مارشل عاصم منیر کی حربی صلاحیتوں نے پاکستان کے خلاف جارحیت کا ارتکاب کرنے والوں کو پسپا ہونے پرمجبور کر دیا اور اور اب آئندہ دشمن پاکستان پر حملہ کرنے سے قبل سو مرتبہ سوچے گا۔ قرار داد میں کہا گیا ہے کہ پاکستان کی بری، فضائی اور بحری افواج وطن عزیز کی جغرافیاتی سرحدوں کے دفاع کیلئے ہمہ وقت چوکس ہیں اور انہوں نے ثابت کر دیا ہے کہ عددی برتری کے باوجود بھارت پاکستان کو ڈرا دھمکا نہیں سکتا۔قرار داد میں کہا گیا ہے کہ پاکستان نے ثابت کر دیا ہے کہ وہ جنوبی ایشیا میں اپنی سلامتی اور خود مختاری کا تحفظ کرنے کی مکمل صلاحیت رکھتا ہے۔