Live Updates

ترکیہ کی دکان میں بھارتی جھنڈا نہ ہونے پر گالم گلوچ کرنے والے انڈین یوٹیوبر نے معافی مانگ لی

یوٹیوبر ملک سواش بکلر نے اپنے رویے پر معافی مانگتے ہوئے اعتراف کیا کہ ان کے الفاظ انتہائی نامناسب اور غلط تھے

ساجد علی منگل 3 جون 2025 15:58

استنبول ( اُردو پوائنٹ اخبارتازہ ترین۔ 03 جون 2025ء ) ترکیہ کی دکان میں بھارتی جھنڈا نہ ہونے پر گالم گلوچ کرنے والے انڈین یوٹیوبر نے معافی مانگ لی۔ تفصیلات کے مطابق ترکیہ میں ایک بھارتی یوٹیوبر کو اس وقت گرفتار کیا گیا جب اس نے ایک دکان میں بھارتی جھنڈا نہ ہونے پر گالم گلوچ کی، اس حوالے سے سوشل میڈیا پر وائرل ہونے والی ویڈیو میں بھارتی یوٹیوبر کو ایک ترک دکان میں داخل ہوتے دیکھا گیا جہاں مختلف ممالک کے جھنڈے لگے ہوئے تھے، وہاں بھارت کا جھنڈا نہ ہونے پر اس نے نازیبا الفاظ کا استعمال شروع کردیا جس پر ترکیہ کے حکام نے نوٹس لیتے ہوئے اُسے گرفتار کرلیا۔

ویڈیو میں یوٹیوبر دکاندار سے بھارتی جھنڈے کے بارے میں سوال کرتا ہے، جھنڈا نہ ملنے پر وہ کہتا ہے کہ ’آئندہ وہ دکان دار کے لیے بھارتی جھنڈا لیتا آئے گا‘، تاہم بعد میں وہ گالیاں دیتے ہوئے اور نازیبا الفاظ استعمال کرتے ہوئے دکان سے باہر چلا گیا، اسی دوران ترک خواتین کے بارے میں اس ہندوستانی یوٹیوبر کے تضحیک آمیز تبصروں کی وجہ سے بھی اس کے خلاف بڑے پیمانے پر غم و غصہ پایا گیا اور واقعے کی ویڈیو منظر عام پر آنے کے بعد ترک حکام نے نوٹس لیتے ہوئے بھارتی یوٹیوبر کو گرفتار کرکے اس کے خلاف قانونی کارروائی کا آغاز کردیا۔

(جاری ہے)

اب اس معاملے میں ایک نئی پیشرفت سامنے آئی ہے کہ ترکیہ کی دکان میں بھارتی جھنڈا نہ ہونے پر گالم گلوچ کرنے والے انڈین یوٹیوبر نے معافی مانگ لی، یوٹیوبر ملک سواش بکلر نے اپنے رویے پر معافی مانگتے ہوئے اعتراف کیا ہے کہ ان کے الفاظ انتہائی نامناسب اور غلط تھے، اس پر بھارتی یوٹیوبر نے معافی مانگی اور اپنے رویے پر شرمندگی کا اظہار بھی کیا، یوٹیوبر نے کہا کہ ان کا رویہ اور زبان غلط تھی اور وہ اپنے رویے پر ترک عوام سے معافی کے طلب گار ہیں۔