گورنرخیبرپختونخوا فیصل کریم کنڈی سے روٹری کلب انٹرنیشنل کے وفد کی ملاقات

منگل 3 جون 2025 21:53

پشاور (اُردو پوائنٹ اخبارتازہ ترین - اے پی پی۔ 03 جون2025ء) گورنر خیبرپختونخوا فیصل کریم کنڈی سے روٹری کلب انٹرنیشنل کے وفد نے شبیر ملک کی قیادت میں منگل کے روز گورنر ہاؤس پشاور میں ملاقات کی، ملاقات میں گورنر کو روٹری انٹرنیشنل کی سماجی خدمات، صحت، تعلیم اور خواتین کے فلاحی منصوبہ جات سے متعلق تفصیلی بریفنگ دی گئی۔ وفد نے بتایا کہ ادارہ فروغ تعلیم، سکولوں کی تعمیر و مرمت، بچوں کو یونیفارم ، بیگز اور فرنیچر کی فراہمی، ماں اور بچے کی صحت، لیڈی ہیلتھ ورکرز کی تربیت اور شجرکاری جیسے منصوبہ جات پر کام کر رہا ہے۔

ملاقات میں پولیو سے بچاؤ کی مہم کے ساتھ ساتھ خواتین کو بااختیار بنانے، فیلوشپ پروگرامز اور بنیادی صحت کے مراکز کو فعال بنانے جیسے اقدامات سے بھی گورنر کو آگاہ کیاگیا۔

(جاری ہے)

گورنر فیصل کریم کنڈی نے روٹری کلب کے اقدامات کو سراہتے ہوئے کہا کہ پولیو کے خلاف جنگ میں معاشرے کے تمام طبقات کو متحرک کرنا ناگزیر ہے۔ انہوں نے کہا کہ ایسی حکمت عملی اپنانا ہوگی کہ والدین خود اپنے بچوں کو پولیو کے قطرے پلوانے کے لیے آگے آئیں۔

مراکز صحت کو اس قدر موثر بنایا جائے کہ والدین خود بخود ان کا رخ کریں۔گورنر ہاؤس نے صوبہ بھر میں پولیو مہم کے لیے فوکل پرسن بھی مقرر کر دیا ہے تاکہ مربوط حکمت عملی کے تحت کام کیا جا سکے۔ انہوں نے سماجی سرگرمیوں میں روٹری کلب کے ساتھ اشتراک کو خوش آئند قرار دیا اور کہا کہ ہلال احمر اور روٹری کلب کے باہمی تعاون سے ایک مضبوط اور دیرپا ماڈل تشکیل دیا جائے گا، جسے مستقبل میں دیگر فلاحی پروگرامز میں بھی وسعت دی جائے گی، انہوں نے صاف پانی کی فراہمی کے حوالہ سے فلٹریشن منصوبہ کو خیبرپختونخوا کے جنوبی اضلاع بالخصوص خطہ دامان کے لئے انتہائی ضروری قرار دیا۔