سندھ حکومت، وزیر اعلی سندھ کی قیادت میں کراچی سرکلر ریلوے کی تکمیل کیلئے پرعزم ہے، شرجیل انعام میمن

بدھ 6 اگست 2025 18:31

کراچی (اُردو پوائنٹ اخبارتازہ ترین - اے پی پی۔ 06 اگست2025ء) سندھ کے سینئر وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کراچی سرکلر ریلوے (کے سی آر)کیلئے سینیٹ کمیٹی برائے ریلویز کی کوششوں کا خیرمقدم کرتے ہوئے کہا ہے کہ سندھ حکومت، وزیر اعلی سندھ کی قیادت میں، کے سی آر کی ہر صورت تکمیل کیلئے پرعزم ہے۔

(جاری ہے)

بدھ کوجاری اپنے ایک بیان میں سینئر وزیر شرجیل انعام میمن نے کہا کہ سندھ حکومت کے سی آر کو ترجیحی بنیادوں پر مکمل کرے گی،کے سی آر کیلئے ایشیائی ترقیاتی بینک سمیت عالمی شراکت داروں سے رابطے جاری ہیں۔

انہوں نے کہا کہ کے سی آر منصوبے میں حائل رکاوٹوں کے حل کیلئے وفاقی حکومت سے تعاون کی امید ہے۔انہوں نے سندھ ماس ٹرانزٹ اتھارٹی کو پاکستان ریلویز سے مل کر پیش رفت تیز کرنے کی ہدایت دی ہے۔ شرجیل انعام میمن نے کہا کہ کے سی آر کراچی کے 2.5کروڑ شہریوں کیلئے اہم ٹرانزٹ سہولت بنے گی ۔انہوں نے کہا کہ سینیٹ کمیٹی کی تجاویز کا بھی خیرمقدم کرتے ہیں ، جلد رکاوٹیں دور ہونے کی امید ہے۔