Live Updates

آئندہ چوبیس گھنٹوں کے دوران لاہور سمیت مختلف علاقوں میں گرج چمک کے ساتھ بارش کا امکان ہے،محکمہ موسمیات

منگل 3 جون 2025 19:30

لاہور (اُردو پوائنٹ اخبارتازہ ترین - اے پی پی۔ 03 جون2025ء) محکمہ موسمیات کی پیشگوئی کے مطابق آئندہ چوبیس گھنٹوں کے دوران لاہور سمیت شمال مشرقی اور وسطی علاقوں میں گرج چمک کے ساتھ مزید بارش کا امکان ہے۔صوبہ پنجاب کے بیشتر اضلاع میں موسم بنیادی طور پر گرم اور خشک جبکہ میدانی علاقوں میں شدید گرم رہے گا۔ تاہم صوبائی دارالحکومت لاہور سمیت سیالکوٹ، نارووال، گوجرانوالہ، حافظ آباد، منڈی بہاوالدین، شیخوپورہ، سرگودھا، خوشاب، بھکر، لیہ، فیصل آباد، ساہیوال، پاکپتن اور خانیوال میں مطلع جزوی طور پر ابر آلود رہنے کے علاوہ آندھی اور گرج چمک کے ساتھ بارش کی تو قع ہے۔

اس دوران چند مقامات پر ژالہ باری بھی ہوسکتی ہے۔ ملتان، بہاولپور، بہاولنگر، ڈیرہ غازی خان اور گردونواح میں آندھی، گرد آلود ہوائیں چلنے کا بھی امکان ہے۔

(جاری ہے)

ترجمان محکمہ موسمیات کے مطابق گزشتہ چوبیس گھنٹوں کے دوران لاہور سمیت پنجاب کے شمال مشرقی اور وسطی علاقوں میں بارش جبکہ بعض مقامات پر ژالہ باری بھی ہوئی تاہم صوبہ کے بیشتر اضلاع میں موسم گرم اور خشک جبکہ میدانی علاقوں میں شدید گرم رہا ۔

لاہور میں کم سے کم درجہ حرارت24 اور زیادہ سے زیادہ36سینٹی گریڈ ریکارڈ کیا گیا جبکہ ہوا میں نمی کا تناسب28 فیصدرہا۔لا ہور میں آلودگی کی مجموعی شرح60فیصد رہی جبکہ شہر کے مختلف علاقوں جن میں لا ہور امر یکن سکول55،پولو گراونڈ 53،فیز ایٹ ڈی ایچ اے 48، جنریشن پاور لمیٹڈ 56اورعسکری ٹین میں53 ایئر کوالٹی انڈیکس ریکارڈ کیا گیا۔