بلوچستان میں وفاقی حکومت کے ترقیاتی اقدامات اور عوام دوست منصوبے ترقی و خوشحالی کی جانب ایک اہم تبدیلی کی نشاندہی کرتے ہیں، گورنر جعفرخان مندوخیل

منگل 3 جون 2025 20:20

کوئٹہ (اُردو پوائنٹ اخبارتازہ ترین - اے پی پی۔ 03 جون2025ء) گورنر بلوچستان جعفرخان مندوخیل نے کہا ہے کہ صوبہ بلوچستان میں موجودہ وفاقی حکومت کے ترقیاتی اقدامات اور عوام دوست منصوبے ترقی و خوشحالی کی جانب ایک اہم تبدیلی کی نشاندہی کرتے ہیں۔ جدید تقاضوں کے تناظر میں صوبے کی عوامی ضروریات کو ترجیح دیتے ہوئے ہم پسماندگی، غربت اور احساس محرومی کے خاتمے کیلئے اقدامات کر رہے ہیں تاکہ بلوچستان کو دیگر صوبوں کے برابر لا سکیں۔

ان خیالات کا اظہار انہوں نے وفاقی دارالحکومت اسلام آباد میں وفاقی وزیر منصوبہ بندی و ترقی احسن اقبال اور وفاقی وزیر تجارت و سرمایہ کاری جام کمال خان سے گفتگو کرتے ہوئے کیا۔ ملاقات کے دوران صوبائی وزیر میر عاصم کرد گیلو بھی موجود تھے۔

(جاری ہے)

وفاقی وزراء نے بلوچستان کو خصوصی ترجیح دینے اور جاری ترقیاتی منصوبوں کو مقررہ وقت پر پایہ تکمیل تک پہنچائے کی یقین دہانی کرائی۔

اس موقع پر گورنر بلوچستان جعفرخان مندوخیل نے کہا کہ ہمارے ترقیاتی منصوبے تعلیم، صحت کی دیکھ بھال، بنیادی ڈھانچے اور تجارت جیسے اہم شعبوں پر توجہ مرکوز کریں گے، ہم تعلیمی اداروں، صحت کے مراکز، سڑکوں اور پلوں کی تعمیر کو ترجیح دے رہے ہیں، بلوچستان کے لوگوں خصوصاً نوجوانوں کو جدید مہارتیں، معیاری تعلیم اور روزگار کے مواقع فراہم کر کے ان کی پوشیدہ صلاحیتوں کو ملک و قوم کے مفاد میں بروئے کار لائیں گے اور روزگار کے مواقع اور معاشی سرگرمیوں کو فروغ دیں گے۔

سی پیک بلوچستان کی ترقی کیلئے گیم چینجر کا موقع پیش کرتا ہے۔ خطے میں رونما ہونے والی معاشی اور سیاسی تبدیلیوں کے پیش نظر صوبے کے قدرتی وسائل، اسٹریٹجک محل وقوع اور قیمتی معدنیات صوبہ کی تقدیر بدلنے کی صلاحیت رکھتے ہیں، ایک جامع حکمت عملی مرتب کر کے ایک تعلیم یافتہ اور ترقی یافتہ بلوچستان کے خواب کو حقیقت میں بآسانی تبدیل کیا جا سکتا ہے۔