پشاور،مسافروں سے زیادہ کرایہ وصول کرنے پر مزید 102 ٹرانسپورٹرز کا چالان

بدھ 4 جون 2025 10:10

پشاور (اُردو پوائنٹ اخبارتازہ ترین - اے پی پی۔ 04 جون2025ء) سٹی ٹریفک پولیس پشاور نے مختلف سیکٹرز میں ناکہ بندیوں کے دوران مسافروں سے زیادہ کرایہ وصول کرنے پر مزید 102 ٹرانسپورٹرز کا چالان کیا۔

(جاری ہے)

چیف ٹریفک آفیسر پشاور ہارون رشید خان نے کہا ہے کہ کسی کو خلاف قانون کام کرنے کی اجازت نہیں دی جائےگی جبکہ حکومت اور ریجنل ٹرانسپورٹ اتھارٹی (آر ٹی اے)کی جانب سے مقرر کردہ کرایہ نامہ پر عملدرآمد نہ کرنے والوں کے خلاف سخت قانونی کارروائی عمل میں لائی جائے گی۔

انہوں نے کہا کہ آر ٹی اے کی جانب سے ٹرانسپورٹرز کے لئے مناسب کرایہ نامہ مقرر کیا جاتا ہے جس سے مسافر اور ٹرانسپورٹرز دونوں مستفید ہوتے ہیں اس کے باوجود مسافروں سے زیادہ کرایہ وصول کرنا ناقابل برداشت ہے۔ انہوں نے کہا کہ مسافروں سے زائد کرایہ وصول کرنے والے کسی قسم کی رعایت کے مستحق نہیں ۔انہوں نے کہا کہ ٹرانسپورٹرز اپنا قبلہ درست کریں بصورت دیگر ان کے خلاف سخت کارروائی عمل میں لائی جائے گی۔