نائب وزیراعظم اسحاق ڈار کی ایرانی صدر سے ملاقات، دوطرفہ تعاون بڑھانے کےعزم کا اعادہ

اتوار 3 اگست 2025 12:10

اسلام آباد ( اُردو پوائنٹ اخبارتازہ ترین - اے پی پی۔ 03 اگست 2025ء ) نائب وزیراعظم اور وزیر خارجہ سینیٹر محمد اسحاق ڈار نے اسلامی جمہوریہ ایران کے صدر سے ملاقات کی ہے۔

(جاری ہے)

ترجمان دفتر خارجہ کی جانب سے جاری اعلامیہ کے مطابق ملاقات اتوار کو یہاں اسلامی جمہوریہ ایران کے صدر ڈاکٹر مسعود پیزشکیان کے دو روزہ دورہ پاکستان کے موقع پر اسلام آباد میں ہوئی، ایرانی صدر کا خیرمقدم کرتے ہوئے نائب وزیر اعظم اور وزیر خارجہ نے مشترکہ تاریخ، مشترکہ ثقافتی ورثے، عقیدے اور باہمی احترام کی مضبوط بنیادوں پر زور دیتے ہوئے ایران کے ساتھ اپنے تاریخی اور برادرانہ تعلقات کے لیے پاکستان کے گہرے عزم کا اعادہ کیا۔

بتایا گیا ہے کہ نائب وزیراعظم اور وزیر خارجہ اسحاق ڈار سے ملاقات کے دوران ایران کے صدر مسعود پیزشکیان نے پاکستان کی حمایت کو سراہا اور مشترکہ دلچسپی کے مختلف شعبوں میں دوطرفہ تعاون کو بڑھانے کے ایران کے عزم کا اعادہ کیا، اس کے علاوہ انہوں نے دونوں دوست ممالک کے درمیان سیاسی اور اقتصادی تعلقات کو مزید تقویت دینے کے لیے پاکستانی رہنماؤں کے ساتھ بامعنی بات چیت کا بھی تذکرہ کیا۔