Live Updates

تحریک حریت کے محبوس چیئرمین امیر حمزہ کے والدسرینگر میں انتقال کرگئے

مسئلہ کشمیر کا منصفانہ اور پائیدار حل اقوام متحدہ کی قراردادوں پر عمل درآمد میں مضمر ہے

بدھ 4 جون 2025 14:46

سرینگر(اُردو پوائنٹ اخبارتازہ ترین - این این آئی۔ 04 جون2025ء)غیرقانونی طورپر بھارت کے زیر قبضہ جموں وکشمیرمیں تحریک حریت جموں و کشمیر کے نظربند چیئرمین اور کل جماعتی حریت کانفرنس کے ممتاز رہنما امیر حمزہ کے والد بزرگوار سرینگر میں انتقال کر گئے۔کشمیرمیڈیاسروس کے مطابق امیر حمزہ اس وقت نئی دہلی کی بدنام زمانہ تہاڑ جیل میں قید و بند کی صوبتیں برداشت کر رہے ہیں ۔

وہ اس وقت بھی بھارتی تعذیب خانے میں بھارتی ظلم و بربریت کا سامنا کررہے تھے جب ان کی اہلیہ داعی اجل کو لبیک کہہ گئی تھیں۔ تحریک حریت نے ایک بیان میں بھارتی سفاکیت کی شدید مذمت کرتے ہوئے کہا کہ غیر قانونی طورپر نظر بند کشمیری حریت پسندوں کے ساتھ اس ظالمانہ سلوک پر انسانی حقوق کے علمبرداروں کو بھارت کا محاسبہ کرنا چاہیے۔

(جاری ہے)

بیان میں تحریک حریت کے اس موقف کو ایک بار پھر دہرایاگیا کہ مسئلہ کشمیر کا منصفانہ اور پائیدار حل اقوام متحدہ کی قراردادوں پر عمل درآمد میں مضمر ہے، تاہم سہہ فریقی مذاکرات کے ذریعے مسئلہ کشمیر کا آبرو مندانہ حل تلاش کیا جاسکتا ہے۔

بیان میں کہاگیا کہ حالیہ پاک بھارت تصادم سے یہ بات ثابت ہوئی کہ مسلہ کشمیر کا حل طلب ہونا عالمی امن کے لیے بالعموم اور جنوبی ایشیا کے لیے بالخصوص مسلسل خطرے کا باعث ہے۔بیان میں کہاگیا کہ تحریک حریت جموں وکشمیر سمجھتی ہے کہ بھارت کے سیاسی رہنمائوں کو اس مسئلے کے آبرو مندانہ حل کے لیے اپنی کاوشیں کرنی چاہیے، تاکہ جنوبی ایشیا کے کروڑوں انسانوں کی زندگیوں کو کسی ایک چنگاری کی نظر ہونے کے امکانات کو ہمیشہ ہمیشہ کے لیے ختم کیا جا سکے۔

تحریک حریت نے اپنے بیان میں امیر حمزہ اور دیگر محبوس رہنمائوں کے عزم و ہمت کو سلام پیش کرتے ہوئے کہا کہ ان عظیم لوگوں کی قربانیاں رائیگاں نہیں جائیں گی۔دریں اثناء کل جماعتی حریت کانفرنس کی آزاد جموں وکشمیر شاخ کے کنوینرغلام محمد صفی اوردیگر حریت رہنمائوں نے اپنے الگ الگ بیانات میں امیر حمزہ اوردیگر لواحقین سے تعزیت اورہمدردی کا اظہارکیا۔ انہوں نے مرحوم کے لئے مغفرت اور لواحقین کے لئے صبرجمیل کی دعا کی ۔