Live Updates

جماعت اسلامی کی پوری طاقت کسانوں کی پشتی بان ہی:۔ لیاقت بلوچ

کسانوں پر ظلم بند کیا جائے۔سردار ظفر حسین، چوہدری منظور گجر، میاں رشید منہالہ، عابد میو

جمعرات 5 جون 2025 22:34

لاہور (اُردو پوائنٹ اخبارتازہ ترین - آن لائن۔ 05 جون2025ء) کسان بورڈ لاہور کے صدر عابد حسین میو کی زیرِ صدارت لاہور کے کارکنان و عہدیداران کی حلف برداری کی پُروقار تقریب منعقد ہوئی، جس میں نائب امیر جماعت اسلامی پاکستان لیاقت بلوچ، کسان بورڈ پاکستان کے مرکزی صدر سردار ظفر حسین چوہدری، نائب صدر چوہدری منظور حسین گجر، وسطی پنجاب کے صدر میاں رشید منہالہ، چیف آرگنائزر چوہدری اختر فاروق میو، اور عمر فاروق سمیت دیگر اہم رہنماؤں نے شرکت کی۔

اس موقع پر خطاب کرتے ہوئے لیاقت بلوچ نے کہا کہ کسان متحد ہو جائیں تو کوئی ان پر ظلم نہیں کر سکے گا۔جماعت اسلامی کی پوری طاقت کسانوں کی پشتی بان ہے۔ پاکستان کی معیشت کی بنیاد زراعت ہے، لیکن حکومتی پالیسیوں میں کسان کو مسلسل نظرانداز کیا جا رہا ہے۔

(جاری ہے)

انہوں نے کہا کہ کسانوں کو ان کی محنت کا درست معاوضہ، سستی کھاد، معیاری بیج اور پانی کی بلا تعطل فراہمی یقینی بنائی جائے تاکہ زراعت کا شعبہ ترقی کرے۔

سردار ظفر حسین چوہدری نے کہا کہ جب تک کسان خوشحال نہیں ہوگا، ملک خود کفیل نہیں ہو سکتا۔ موجودہ معاشی بحران سے نکلنے کے لیے زراعت پر توجہ دینا ہو گی۔ انہوں نے حکومت سے مطالبہ کیا کہ زرعی قرضوں پر سود ختم کیا جائے اور کسان دوست پالیسیوں کا اعلان کیا جائے۔چوہدری منظور حسین گجر نے کہا کہ مہنگی بجلی، کھاد اور کیڑے مار ادویات نے کسان کی کمر توڑ دی ہے۔

کسانوں کی نمائندہ تنظیم کے طور پر کسان بورڈ پاکستان ہر فورم پر کسانوں کی آواز بنے گا۔میاں رشید منہالہ نے کہا کہ کسان صرف فصل نہیں اگاتا، بلکہ وہ ملک کی غذائی خودکفالت کی ضمانت ہے۔ حکومت کو چاہیے کہ وہ زراعت کو صنعتی شعبوں کے برابر اہمیت دے۔صدر لاہور عابد حسین میو نے شرکاء کا شکریہ ادا کرتے ہوئے کہا کہ لاہور کے کسان ہر میدان میں متحرک کردار ادا کریں گے اور کسان بورڈ پاکستان کی قیادت کے شانہ بشانہ چلیں گے۔تقریب میں کسانوں کے دیرینہ مسائل، موجودہ زرعی بحران اور ان کے حل کے لیے مشترکہ لائحہ عمل بنانے پر اتفاق کیا گیا۔