حکومت پنجاب نے ماحولیاتی بہتری کیلئےاہم اقدامات کئے ، وزیر اعلیٰ مریم نواز

لاہور (اُردو پوائنٹ اخبارتازہ ترین - اے پی پی۔ 05 جون2025ء) وزیراعلیٰ مریم نواز نے کہا ہے کہ پنجاب کی پہلی کلائمیٹ پالیسی، کلائمیٹ ریزیلینٹ پنجاب ویژن اینڈ ایکشن پلان کانافذ کر دیا گیا ہے۔ انوائرمنٹ فرینڈلی سٹارٹ اپس اور بزنس کیلئے 15ارب روپے کا خصوصی انوائرمنٹل انڈومنٹ فنڈ قائم کیا گیا ہے۔تحفظ ماحولیات کیلئے پنجاب کو پاکستان کی پہلی انوائرمنٹل پروٹیکشن فورس قائم کرنے کا اعزاز حاصل ہے اور پاکستان کی پہلی عالمی معیار کی گرین بلڈنگ بھی تکمیل کے آخری مراحل میں ہے۔

مریم نواز نے عالمی یوم ماحولیات پر اپنے خصوصی پیغام میں کہا کہ ایک سال میں پنجاب کا ماحولیاتی عہد تبدیل ہوچکا ہے۔ پنجاب نے ایک سال میں ماحولیاتی بہتری کیلئے وہ اقدامات کیے جن کی ماضی میں کوئی مثال نہیں ملتی۔

(جاری ہے)

تحفظ ماحولیات کیلئے پلاسٹک مینجمنٹ سیل قائم کیا گیا جو سنگل یوز پلاسٹ پر پابندی یقینی بنارہے ہیں۔انہوں نے کہا کہ پنجاب میں پہلی مرتبہ پلاسٹک بنانے اور بیچنے والوں کی آن لائن رجسٹریشن شروع کی گئی۔

سموگ کے سدباب کیلئے پہلی مربتہ عالمی معیار کے مطابق گاڑیوں کی امیشن ٹیسٹنگ سرٹیفکیشن شروع کی گئی۔پنجاب میں امیشن ٹیسٹنگ سرٹیفکیشن کے تحت لاکھوں گاڑیوں کی رجسٹریشن ہوچکی ہے۔ انہوں نے کہا کہ صوبہ بھر میں ماحولیاتی صورتحال کی مانیٹرنگ کیلئے 50ایئر کوالٹی مانیٹرنگ سٹیشن نصب کیے جا چکے ہیں۔ عوام میں ماحولیاتی آلودگی کے خاتمے کے شعور و آگاہی کیلئے شہروں اور دیہات میں کلائمیٹ لیڈر شپ، ڈویلپمنٹ انٹرن شپ پروگرام کے تحت ہزاروں نوجوان سرگرم عمل ہیں۔

آرٹیفیشل انٹیلیجنس کی مدد سے ماحولیاتی تحفظ یقینی بنانے کیلئے جی آئی ایس سکواڈ قائم کیا گیا ہے۔ وزیراعلیٰ نے کہا کہ سموگ کے تدارک کیلئے پٹرول کے معیار کے چیکنگ کیلئے چار فیول ٹیسٹنگ لیب قائم کی گئی ہے۔ دھول مٹی سے بچائو کیلئے زیر تمیر عمارتوں پر سپرنکلر سسٹم کی تنصیب یقینی بنائی جارہی ہے۔ پہلی مرتبہ دریاں اور برساتی نالوں پر پانی کا معیار چیک کرنے کیلئے 15واٹر کوالٹی مانیٹرنگ سٹیشن قائم کیے جارہے ہیں۔

شجرکاری، ری سائیکلنگ اور ای بائیک کے ذریعے وزیراعلیٰ گرین کریڈٹ پروگرام سے ماحولیاتی فوائد حاصل کیے جارہے ہیں۔ انہوں نے کہا کہ عوام میں ماحولیاتی آگاہی اور شعور کی بیداری کیلئے محکمہ تحفظ ماحول اور موسمیاتی تبدیلی میں پہلا سٹریٹجک سیل قائم کیا گیا ہے۔ ماحول کے تحفظ میں کامیاب اقدامات کی بدولت ای پی اے نے پنجاب کو پاکستان کی پہلی ای ایس او سرٹیفائیڈ ایجنسی قرار دیا ہے۔

انہوں نے کہا کہ ماحولیاتی تحفظ کے سلسلے میں عوامی فیڈ بیک کیلئے پہلی مخصوص ہیلپ لائن 1317قائم کی گئی ہے۔ سموگ روکنے کیلئے 2000 سے زائد انڈسٹریل یونٹس میں امیشن کنٹرول سسٹم کی تنصیب اور تمام یونٹس کی ای میپنگ کی جارہی ہے۔ پنجاب میں پہلی مرتبہ اینٹوں کے تمام بھٹے زگ زیگ ٹیکنالوجی پر منتقل کر دیئے گئے ہیں۔ ماحولیاتی عہد کو عملی اقدام میں تبدیل کرنے کیلئے پانچ ڈویژن میں انوائرمنٹل ڈویژنل آفس قائم کر دیئے گئے ہیں اور چار نئے ڈویژنل آفس قائم کئے جارہے ہیں۔

انہوں نے کہا کہ پنجاب میں پہلی مرتبہ سرکاری محکموں میں انوائرمنٹل سوشل سیف گارڈ ٹریننگ کا اہتمام کیا جارہا ہے۔ عوام کی سہولت کیلئے گرین پنجاب ایپ بھی قائم کی گئی ہے۔انہوں نے کہا کہ لاہور میں الیکٹرک بس سروس شروع کر دی گئی، تمام ڈویژن میں مزید 1100الیکٹرک بسیں مہیا کی جائیں گی۔ پنجاب بھر میں وہیکلز کیلئے خصوصی چارجنگ سٹیشن بنائے جارہے ہیں۔