پاکستان کرپٹو کونسل کا فالو اپ اجلاس ،پاکستان میں ڈیجیٹل اور ورچوئل اثاثہ جات کے لیے جامع ریگولیٹری فریم ورک کی تیاری میں پیش رفت کا جائزہ لیا گیا

جمعرات 5 جون 2025 23:00

اسلام آباد (اُردو پوائنٹ اخبارتازہ ترین - اے پی پی۔ 05 جون2025ء) پاکستان کرپٹو کونسل (پی سی سی ) کا فالو اپ اجلاس وزارت خزانہ میں منعقد ہوا جس میں پاکستان میں ڈیجیٹل اور ورچوئل اثاثہ جات کے لیے جامع ریگولیٹری فریم ورک کی تیاری میں پیش رفت کا جائزہ لیا گیا۔ اجلاس کی صدارت وفاقی وزیر برائے خزانہ و محصولات سینیٹر محمد اورنگزیب نے کی۔اجلاس میں وزیر مملکت / وزیر اعظم کے معاون خصوصی برائے بلاک چین اور کرپٹو اور پاکستان کرپٹو کونسل کے چیف ایگزیکٹو آفیسر بلال بن ثاقب نے ویڈیو لنک کے ذریعے شرکت کی۔

دیگر شرکاء میں گورنر اسٹیٹ بینک آف پاکستان، چیئرمین سیکیورٹیز اینڈ ایکسچینج کمیشن آف پاکستان (ایس ای سی پی )، سیکرٹری وزارت قانون و انصاف، اور سیکرٹری وزارت انفارمیشن ٹیکنالوجی و ٹیلی کمیونیکیشن شامل تھے۔

(جاری ہے)

اجلاس کے دوران وزارتِ قانون و انصاف نے مجوزہ قانونی فریم ورک کا مسودہ پیش کیا، جو پاکستان کرپٹو کونسل، کلیدی اسٹیک ہولڈرز، اور تکنیکی ماہرین کے ساتھ قریبی مشاورت کے بعد تیار کیا گیا ہے۔

یہ مسودہ ڈیجیٹل اور ورچوئل اثاثوں کے لیے ایک مضبوط ریگولیٹری ڈھانچہ فراہم کرتا ہے، جس میں گورننس کے طریقہ کار، لائسنسنگ کے اصول، اور سرمایہ کاروں کے تحفظ کی شقیں شامل ہیں۔ یہ فریم ورک بین الاقوامی بہترین روایات اور عالمی معیارات سے ہم آہنگ ہے۔وفاقی وزیر خزانہ محمد اورنگزیب نے تمام متعلقہ اداروں کی مشترکہ کوششوں کو سراہا اور اس بات پر زور دیا کہ اس فریم ورک کو جلد از جلد حتمی شکل دے کر نافذ کیا جائے تاکہ قانونی وضاحت فراہم کی جا سکے اور بلاک چین و کرپٹو ٹیکنالوجیز کے معاشی امکانات سے فائدہ اٹھایا جا سکے۔

اجلاس کے دوران مسودے کا تفصیلی جائزہ لیا گیا اور اس میں ضروری اصلاحات کی گئیں۔ شرکاء نے متفقہ طور پر فیصلہ کیا کہ "ان پرنسپل" منظوری کا عمل تیز کیا جائے گا تاکہ بروقت قانون سازی اور مؤثر نفاذ کو یقینی بنایا جا سکے۔