قربانی کے گوشت کو 18 ڈگری سینٹی گریڈ یا اس سے کم درجہ حرارت پر ذخیرہ کریں ، ڈائریکٹر جنرل پنجاب فوڈ اتھارٹی

جمعہ 6 جون 2025 13:30

اسلام آباد (اُردو پوائنٹ اخبارتازہ ترین - اے پی پی۔ 06 جون2025ء) ڈائریکٹر جنرل پنجاب فوڈ اتھارٹی محمد عاصم جاوید نے کہا ہے کہ قربانی کے گوشت کو 18 ڈگری سینٹی گریڈ یا اس سے کم درجہ حرارت پر ذخیرہ کریں ۔ اپنے انٹرویو میں انہوں نے شہریوں پر زور دیا کہ عید کے چند دنوں میں گوشت کا استعمال کیا جائے ۔ انہوں نے خبردار کیا کہ گوشت کو زیادہ دیر تک ذخیرہ کرنے سے بیکٹیریا کی افزائش ہوتی ہے اور اس سے صحت کو سنگین خطرات لاحق ہوسکتے ہیں۔

انہوں نے کہا کہ گوشت کو طویل عرصے تک فریزر میں ذخیرہ کرنے سے نقصان دہ مرکبات کی تشکیل اور غذائیت کی قدر میں کمی واقع ہو سکتی ہے۔ انہوں نے کہا کہ جب گوشت کو زیادہ دیر تک ذخیرہ کیا جاتا ہے تو بیکٹیریا اور دیگر جراثیم زندہ رہ سکتے ہیں اور نمو بھی پا سکتے ہیں، جو ممکنہ طور پر کھانے سے پیدا ہونے والی بیماریوں کا باعث بنتے ہیں۔

(جاری ہے)

انہوں نے کہا کہ اس طرح کے گوشت کا استعمال صحت کے سنگین مسائل کا باعث بن سکتا ہے جس سے فوڈ پوائزننگ، معدے کے مسائل اور یہاں تک کہ طویل مدتی صحت کے مسائل کا بھی خدشہ ہو سکتا ہے۔

انہوں نے بتایا کہ رواں سال وزیراعلیٰ پنجاب کی ہدایت پر پنجاب فوڈ اتھارٹی نے عید الاضحیٰ کے لیے ایک خصوصی ایڈوائزری جاری کی ہے جس میں صحت عامہ اور تحفظ کو یقینی بنانے کے لیے گوشت کی محفوظ طریقے سے ہینڈلنگ اور ذخیرہ کرنے کے لیے رہنما اصول وضع کیے گئے ہیں۔ ڈائریکٹر جنرل پنجاب فوڈ اتھارٹی نے عید کے دوران متوازن کھانے پر زور دیتے ہوئے شہریوں کو مشورہ دیا کہ زیادہ کھانے سے گریز کریں اور اپنے گوشت کے پکوان میں سبزیاں شامل کریں۔

انہوں نے یہ بھی مشورہ دیا کہ گوشت کی تیاری میں ضرورت سے زیادہ تیل سے گریز کریں اور گوشت کھانے کے بعد لیموں کا پانی استعمال کریں تاکہ ہاضمے میں مدد مل سکے۔ ڈی جی نے بتایا کہ ابلے ہوئے گوشت کو محفوظ طریقے سے منجمد کیا جا سکتا ہے، شرطیکہ اس کی کوالٹی کو برقرار رکھنے کے لیے اسے مناسب طریقے سے ذخیرہ کیا جائے۔