سردار ایاز صادق کی عید الاضحی کے پر مسرت موقع پر امت مسلمہ اور پاکستانی قوم کو مبارکباد

اسلام آباد (اُردو پوائنٹ اخبارتازہ ترین - این این آئی۔ 06 جون2025ء) اسپیکر قومی اسمبلی سردار ایاز صادق نے کہا کہ عید الاضحٰی ہمیں قربانی، ایثار، خلوص اور اطاعت کا پیغام دیتی ہے۔اپنے بیان میں انہوں نے کہا کہ حضرت ابراہیم علیہ السلام اور حضرت اسماعیل علیہ السلام کی قربانی خالص بندگی اور اطاعتِ الٰہی کی وہ عظیم مثال ہے جو ہمیشہ انسانیت کے لیے مشعلِ راہ رہے گی۔

انہوں نے کہا کہ عید الاضحی ہمیں اللّٰہ تعالیٰ کی رضا کی خاطر ہر قسم کی قربانی کے لیے تیار رہنے اور اس کے احکامات کے سامنے مکمل اطاعت اور انکساری کا مظاہرہ کرنے کا درس دیتی ہے۔ ان خیالات کا اظہار انہوں نے عید الاضحٰی کے پرمسرت موقع پر امت مسلمہ خصوصاً پاکستانی قوم کو مبارکباد دیتے ہوئے اپنے پیغام میں کیا۔

(جاری ہے)

اسپیکر قومی اسمبلی نے کہا کہ عید کا حقیقی پیغام محتاجوں، یتیموں اور کمزور طبقات کو اپنی خوشیوں میں شامل کرنا ہے۔

انہوں نے کہا کہ اپنے اردگرد موجود مستحق افراد کی مدد کرنا ہم سب کی مشترکہ ذمہ داری ہے۔ عید کی خوشیوں میں انہیں شامل کر کے ہم اللہ تعالیٰ کی خوشنودی حاصل کر سکتے ہیں۔ اسپیکر قومی اسمبلی نے عید الاضحیٰ کے موقع پر صفائی و ستھرائی کا خاص خیال رکھنے کی ضرورت پر زور دیتے ہوئے کہا کہ سنتِ ابراہیمی کی پیروی میں قربانی ادا کرنا ہمارا دینی فریضہ ہے، تاہم اس کے ساتھ ساتھ صفائی، نظم و ضبط اور سماجی ذمہ داریوں کا خیال رکھنا بھی ہم سب کی مشترکہ ذمے داری ہے۔

انہوں نے عوام سے اپیل کی کہ قربانی کی باقیات اور کھالیں حکومتی ہدایات کے مطابق مناسب انداز میں ٹھکانے لگائی جائیں تاکہ صفائی کا نظام متاثر نہ ہو اور بیماریوں کے پھیلاؤ اور ماحولیاتی آلودگی سے بچاؤ ممکن بنایا جا سکے۔اسپیکر سردار ایاز صادق نے کہا کہ خوشی اور مسرت کے اس موقع پر ہمیں اپنے مظلوم کشمیری اور فلسطینی بھائیوں کو نہیں بھولنا چاہیے جو آزادی اور بنیادی انسانی حقوق کے حصول کے لیے بے مثال قربانیاں دے رہے ہیں۔

بھارت اور اسرائیل کی جانب سے جاری انسانی حقوق کی سنگین خلاف ورزیوں پر عالمی برادری کی خاموشی اور بے حسی قابلِ تشویش ہے۔ انہوں نے کہا کہ اقوامِ عالم کو اس صورتحال کا سنجیدگی سے نوٹس لیتے ہوئے مظلوم کشمیریوں اور فلسطینیوں کو انصاف فراہم کرنے کے لیے مؤثر اور فوری اقدامات کرنے چاہیے۔اسپیکر قومی اسمبلی نے اس موقع پر دعا کی کہ اللہ تعالیٰ ہمیں عید الاضحیٰ کی حقیقی روح کو سمجھنے، اس پر عمل کرنے اور قربانی، ایثار اور اطاعت جیسے اعلیٰ اسلامی اقدار کو اپنی زندگیوں میں اپنانے کی توفیق عطا فرمائے۔

انہوں نے کہا کہ یہ مبارک دن امتِ مسلمہ اور بالخصوص پاکستانی قوم کے لیے باعثِ برکت، خوشی اور روحانی ارتقائ کا ذریعہ بنے، اور ہم سب اخوت، اتحاد اور یکجہتی کے جذبے کو فروغ دے کر ایک پرامن اور فلاحی معاشرے کی تشکیل میں اپنا کردار ادا کریں۔