عید الاضحیٰ :صوبہ بھر کی مساجد، امام بارگاہوں، عید اجتماعات اور شہریوں کے تحفظ کیلئے سکیورٹی انتظامات مکمل ، ترجمان پنجاب پولیس

لاہور (اُردو پوائنٹ اخبارتازہ ترین - اے پی پی۔ 06 جون2025ء) انسپکٹر جنرل پولیس پنجاب ڈاکٹر عثمان کی ہدایت پر پنجاب پولیس نے عید قربان کے موقع پر صوبہ بھر کی مساجد، امام بارگاہوں، عید اجتماعات اور شہریوں کے تحفظ کیلئے سکیورٹی انتظامات مکمل کر لیے ہیں۔ ترجمان پنجاب پولیس نے بتایا کہ صوبہ بھر میں 28074 مساجد اور 890 کھلے مقامات پر نماز عید اجتماعات کی سکیورٹی کیلئے 43 ہزار سے زائد افسران و اہلکار فرائض سرانجام دیں گے۔

445 کوئیک رسپانس فورس کی ٹیمیں بھی سکیورٹی انتظامات پر تعینات ہونگی۔ 11912 میٹل ڈکٹیٹرز، 225 واک تھرو گیٹس اور 10466سی سی ٹی وی کیمرے بھی نماز عید پر سکیورٹی انتظامات کیلئے استعمال کئے جائیں گے۔صوبائی دارالحکومت لاہور میں نماز عید کے 5 ہزار سے زائد اجتماعات کی سکیورٹی پر 09 ہزار سے زائد اہلکار و افسران تعینات ہوں گے۔

(جاری ہے)

آئی جی پنجاب ڈاکٹر عثمان انور نے عیدالاضحیٰ پر سکیورٹی ہائی الرٹ رکھنے کا حکم دیتے ہوئے کہا کہ موجودہ سرحدی صورتحال کے پیش نظر لاہور سمیت صوبہ بھر میں سکیورٹی بڑھا دی جائے۔

عید تعطیلات کے دوران پارکوں اور تفریحی مقامات کی سکیورٹی کیلئے اضافی نفری تعینات کی جائے۔ ون ویلنگ، ہوائی فائرنگ، پتنگ بازی اور ہلڑ بازی ہرگز برداشت نہیں کی جائے گی۔ قربانی کی کھالیں اکٹھی کرنے کے حوالے سے حکومت پنجاب کے جاری کردہ ایس او پیز پر عمل درآمد یقینی بنائیں۔ غیر قانونی سرگرمیوں میں ملوث تمام کالعدم تنظیموں اور فورتھ شیڈول میں شامل افراد کی نگرانی کا عمل مزید موثر بنایا جائے۔

نماز عید سے قبل تمام مساجد، امام بارگاہوں اور عید گاہوں کی مکمل چیکنگ اور کلیرینس کو ہرصورت یقینی بنایا جائے۔ اے کیٹیگری مساجد اور امام بارگاہوں کی چھتوں پر سنائپرز اور عید اجتماعات کے اندر سادہ لباس میں کمانڈوز تعینات کئے جائیں۔ ڈی آئی جی ٹریفک عید کے موقع پر صوبہ بھر میں ٹریفک کے بہا کو یقینی بنانے کیلئے ٹریفک مینجمنٹ پلان کی خود نگرانی کریں۔

عید کے موقع پر سٹریٹ کرائمز اور ہائی ویز پر رابری کی روک تھام کیلئے موثر انسدادی انتظامات کئے جائیں۔ عید الاضحیٰ پر ٹریفک روانی کیلئے تمام متعلقہ پوائنٹس پر اضافی نفری تعینات کی جائے۔ عید قربان کی تعطیلات میں مری، دیگر سیاحتی مقامات پر سیاحوں کی سہولت اور تحفظ کیلئے تمام وسائل بروئے کار لائیں۔ مری میں گاڑیوں کے داخلے اور اخراج کے حوالے سے جاری کردہ ایس او پیز پر عملدرآمد کیا جائے۔