جدہ سے بعد از حج فلائٹ آپریشن کا آغاز کل سے ہوگا، حجاج کرام کی پہلی پرواز اسلام آباد پہنچے گی

ملک کے مختلف ایئر پورٹس پر 7 پروازیں حجاج کرام کو واپس لیکر پہنچیں گی، حج آپریشن کا اختتام 10 جولائی کو تمام حاجیوں کی واپسی کے ساتھ مکمل ہوگا

فیصل علوی پیر 9 جون 2025 12:55

جدہ سے بعد از حج فلائٹ آپریشن کا آغاز کل سے ہوگا، حجاج کرام کی پہلی پرواز ..

اسلام آباد(اردوپوائنٹ اخبار تازہ ترین۔09 جون 2025)جدہ سے بعد از حج فلائٹ آپریشن کا آغاز کل سے ہوگا، ملک کے مختلف ایئر پورٹس پر 11 جون کو 7 پروازیں حجاج کرام کو واپس لیکر پہنچیں گی، حجاج کرام کی پہلی پرواز11 جون کی صبح 3 بجکر 50 منٹ پر اسلام آباد پہنچے گی، دوسری پرواز ایس وی 3722 گیارہ جون کو 9 بج کر 10 منٹ پر اسلام آباد پہنچے گی۔ تیسری پرواز 11 جون کو لاہور میں 11 بج کر 50 منٹ پر پہنچے گی جبکہ چوتھی حج پرواز 11 جون کو 12 بجکر 10 منٹ اسلام آباد لینڈ کرے گی۔

اسی طرح حجاج کرام کی پانچویں پرواز 12 بجکر 35 منٹ پر ملتان پہنچے گی چھٹی پرواز دوپہر ایک بجکر 35 منٹ پر کراچی پہنچے گی۔ حجاج کرام کی ساتویں پرواز 2 بج کر 30 منٹ پر لاہور پہنچے گی جبکہ آٹھویں پرواز12 جون کو صبح 5 بجکر 20 منٹ اسلام آباد پہنچے گی۔

(جاری ہے)

حج آپریشن کا اختتام 10 جولائی کو تمام حاجیوں کی واپسی کے ساتھ مکمل ہوگا۔ اس ایک ماہ کے دوران 342 پروازوں کے ذریعے سرکاری اسکیم کے 88 ہزار 390 حاجیوں کو وطن واپس لایا جائے گا۔

اس حج فلائٹ آپریشن میں پاکستان کی سرکاری، نجی اور سعودی ایئر لائنز شریک ہوں گی تاکہ حاجیوں کی واپسی کو بروقت اور محفوظ بنایا جا سکے۔ دوسری جانب پہلی حج پرواز 11جون کو 148 حجاج کرام کو جدہ سے لےکر کراچی پہنچے گی۔ قومی ایئرلائن کا بعداز حج فلائٹ آپریشن 10 جون سے شروع ہوگا۔ پی آئی اے کی پروازیں اسلام آباد اور لاہور پہنچیں گی۔ نجی ایئرلائن کی پہلی حج پرواز 11 جون دوپہر کو ایک بجے کراچی ایئرپورٹ پہنچے گی۔

پہلی حج پرویزکے ذریعے 148 حجاج کرام جدہ سے کراچی پہنچیں گے، صوبائی وزیر اوقاف ریاض حسین شاہ کراچی ایئرپورٹ پرحجاج کا استقبال کریں گے۔ دنیا بھر سے آئے 16 لاکھ 73 ہزار 230 عازمین نے حج کی سعادت حاصل کی ہے۔سعودی ادارہ شماریات کے مطابق ان میں سے 15 لاکھ 6 ہزار 576 حجاج کرام 171 مختلف ممالک سے آئے جب کہ سعودی عرب کے اندر سے ایک لاکھ 66 ہزار 654 افراد نے حج ادا کیا۔حجاج کرام میں 8 لاکھ 77 ہزار 841 مرد اور 7 لاکھ 95 ہزار 389 خواتین شامل تھیں۔سعودی عرب میں سعودی پوسٹ نے حج سیزن 2025 کے دوران تین ریال مالیت کا یاد گاری ٹکٹ اور ایک پوسٹ کارڈ جاری کردیا تھا جس کی قیمت پانچ ریال تھی۔