چیف ٹریفک آفیسر اسلام آباد کیپٹن (ر) سید ذیشان حیدر وفاقی دارالحکومت میں عید پر ٹریفک کی روانی کو یقینی بنانے کیلئے متحرک

پیر 9 جون 2025 14:10

اسلام آباد (اُردو پوائنٹ اخبارتازہ ترین - اے پی پی۔ 09 جون2025ء) چیف ٹریفک آفیسر (سی ٹی او) اسلام آباد کیپٹن (ر) سید ذیشان حیدر عید کے تیسرے روز بھی شہر کی اہم شاہراہوں اور تفریحی مقامات پر ٹریفک کی صورتحال کا جائزہ لینے اور گاڑیوں کی آمدورفت کو یقینی بنانے کے لیے موجود رہے۔اسلام آباد پولیس حکام نے کہا ہے کہ اسلام آباد ٹریفک پولیس کے 300 سے زائد اہلکار ایک جامع حکمت عملی کے تحت عید کی تعطیلات کے دوران شہر بھر میں ٹریفک کی روانی کو برقرار رکھنے کے لیے سرگرم عمل ہیں۔

سی ٹی او نے ٹریفک کی روانی کو بہتر بنانے کے لیے اور اپنے اہل خانہ سے دور ڈیوٹی سرانجام دینے والے ٹریفک اہلکاروں کی لگن کو سراہا۔انہوں نے کہا کہ ٹریفک قوانین کی خلاف ورزی کرنے والوں کے خلاف سخت کارروائی کی جا رہی ہے جن میں ون ویلرز، تیز رفتار موٹر سائیکل چلانے والوں اور سائلینسر کے بغیر موٹر سائیکل چلانے والوں کے خلاف سخت کارروائی کی جا رہی ہے۔

(جاری ہے)

سی ٹی او سید ذیشان حیدر نے کہا کہ سنگین خلاف ورزیوں پر متعدد موٹرسائیکلیں اور گاڑیاں ضبط کی گئی ہیں جبکہ سڑکوں پر غیر قانونی پارکنگ اور خلل ڈالنے والے رویے کے خلاف زیرو ٹالرنس پالیسی پر عمل کیا جا رہا ہے۔انہوں نے کہا کہ موثر منصوبہ بندی اور ٹریفک افسران کی مسلسل کوششوں سے کوئی ناخوشگوار واقعہ پیش نہیں آیا۔ انہوں نے کہا کہ عید کے شدید رش کے باوجود شہر بھر میں ٹریفک ہموار رہی، افسران نے بھیڑ کو مؤثر طریقے سے منظم کیا اور مقبول تفریحی مقامات پر ہجوم کو کنٹرول کیا۔

انہوں نے پارکوں اور تفریحی مقامات پر آنے والے شہریوں کو مشورہ دیا کہ وہ مرکزی سڑکوں پر پارکنگ سے گریز کریں اور پارکنگ کی مخصوص جگہوں کا استعمال کریں۔سی ٹی او نے شہریوں پر زور دیا کہ ٹریفک افسران کے ساتھ تعاون کریں اور کسی بھی شکایت کی اطلاع اسلام آباد ٹریفک پولیس ہیلپ لائن 1915 پر دیں۔