وزیر زراعت خیبرپختونخوا نے کرک میں کاظم کلہ- ایمارکئی قبرستان روڈ کاسنگ بنیاد رکھ دیا

پیر 9 جون 2025 20:10

پشاور(اُردو پوائنٹ اخبارتازہ ترین - این این آئی۔ 09 جون2025ء) خیبرپختونخوا کے وزیر زراعت میجر(ر) محمد سجاد بارکوال نے ایم این اے شاہد خٹک کے ہمراہ ضلع کرک میں کاظم کلہ تا ایمارکئی قبرستان روڈ کاسنگ بنیاد رکھ دیا۔ اس موقع پر پاکستان تحریک انصاف کے کارکنان اور عمائدین علاقہ کثیر تعداد میں شریک تھے۔ وزیر زراعت نے افتتاحی تقریب سے اپنے خطاب میں وزیر اعلیٰ کا شکریہ ادا کرتے ہوئے کہا کہ انہوں نے ضلع کرک کو اپنے ترجیحات میں رکھا ہے۔

انشاء اللہ یہ دور کرک کی حقیقی ترقی کا دور ثابت ہو گا۔انہوں نے کہا کہ مذکورہ روڈ منصوبے کی تکمیل سے علاقے میں ترقی کا نیا دور شروع ہوگا جس کے متعلقہ برانچ روڈ منصوبوں پربھی کام کیا جائے گا۔انہوں نے اس عظیم منصوبے کی کامیابی کیلئے مل کر کام کرنے کے عزم کا اظہار کیا۔

(جاری ہے)

قبل ازیں دبلی لواغر میں منعقدہ عوامی اجتماع سے خطاب کرتے ہوئے وزیر زراعت نے کہا کہ وسائل کی تقسیم میں محروم رکھے جانے والے علاقوں کے محرومیوں کا ترجیحی بنیادوں پر ازالہ کیا جائے گا جس کیلئے مشترکہ جدوجہد کریں گے۔

انہوں نے لواغر بیلٹ کو درپیش مسائل کا ذکر کرتے ہوئے کہا کہ انہیں یہاں کے مسائل کا بخوبی ادراک ہے، انشاء اللہ انہیں عوام کے اُمنگوں کے مطابق میرٹ پر حل کریں گے۔سجاد بارکوال نے کہا کہ تحصیل ہیڈکوارٹر تخت نصرتی اور سٹی ہیڈکوارٹر کرک کے ساتھ راستوں کے علاوہ بنیادی مرکز صحت، ٹیوب ویلوں کی سولرائزیشن، ایرگیشن چینلز، زرعی ٹیوب ویلز اور سمال ڈیمز سمیت دیگر اہم منصوبوں پر بھی فوری کام کیاجائے گا۔انہوں نے اس موقع پر دبلی لواغر تا کندوخیل روڈ پر بھی عنقریب کام شروع کرنے کا عندیہ دیا۔تقریب کے اختتام پر وزیر زراعت نے پی ٹی آئی میں نئے شامل ہونے والوں کو پارٹی ٹوپیاں پہناکر انہیںپارٹی میں خوش آمدید کہا۔