Live Updates

آئی سی سی نے ثناء میر کو ہال آف فیم میں شامل کرلیا

ثناء میر آئی سی سی ہال آف فیم میں شامل ہونے والی پاکستان کی پہلی خاتون کرکٹر بن گئی

ذیشان مہتاب منگل 10 جون 2025 12:29

آئی سی سی نے ثناء میر کو ہال آف فیم میں شامل کرلیا

لاہور (اردو پوائنٹ تازہ ترین اخبار ۔ 10 جون 2025ء ) انٹرنیشنل کرکٹ کونسل (آئی سی سی) نے پاکستان ویمنز ٹیم کی سابق کپتان ثنا میر کو آئی سی سی ہال آف فیم میں شامل کر لیا۔ ثناء میر پاکستان کی پہلی خاتون کرکٹر ہیں جن کو اس اعزاز سے نوازا گیا ہے۔

آئی سی سی کی ویب سائٹ پر جاری بیان کے مطابق پیر کے روز آئی سی سی کی جانب سے آئی سی سی ہال آف فیم سات نئے کرکٹرز کو شامل کیا گیا۔

لندن میں ایبے روڈ اسٹوڈیوز میں منعقد ایک تقریب میں چیئرمین جے شاہ نے ہال آف فیم میں شامل ہونے والے سات نئے ممبرز کو خوش آمدید کہا۔

ہال آف فیم میں شامل کیے جانے پر ثنا میر کا کہنا تھا کہ آج اس مقام پر ان لوگوں کے ساتھ کھڑا ہونا جن کو بیٹ تھامنے سے قبل آئیڈل بنایا تھا ایک ایسا لمحہ ہے جس کو تصور کرنے کی وہ ہمت بھی نہیں کر سکتی تھیں۔

(جاری ہے)

انہوں نے مزید کہا کہ وہ اس عزت افزائی کے لیے انتہائی مشکور ہیں اور امید کرتی ہیں کہ وہ اس کھیل کو کسی بھی طرح کچھ دے سکیں۔

واضح رہے ثناء میر نے اپنے وائٹ بال کیریئر (ٹی ٹونٹی اور ایک روزہ فارمیٹ) میں مجموعی طور پر 240 وکٹیں حاصل کیں اور 2432 رنز اسکور کیے۔

ثناء میر کے علاوہ میتھیو ہیڈن (آسٹریلیا)، ہاشم آملا (جنوبی افریقا)، ایم ایس دھونی (بھارت)، گریم سمتھ (جنوبی افریقا)، ڈینیئل ویٹوری (نیوزی لینڈ) اور سارہ ٹیلر (انگلینڈ) کو بھی ہال آف فیم میں شامل کیا گیا۔