د*پنجاب میں گرمی اور ہیٹ ویو کی صورتحال 13جون تک برقرار رہنے کی پیشگوئی

ٖدرجہ حرارت معمول سے 7ڈگری تک زیادہ رہے گا،غیر ضروری گھر سے باہر نہ نکلیں ‘ پی ڈی ایم اے

منگل 10 جون 2025 19:50

J لاہور (اُردو پوائنٹ اخبارتازہ ترین - آن لائن۔ 10 جون2025ء) پنجاب میں گرمی اور ہیٹ ویو کی صورتحال 13جون تک برقرار رہنے کی پیشگوئی کی گئی ہے ،درجہ حرارت معمول سے 7ڈگری تک زیادہ رہے گا۔ترجمان پی ڈی ایم اے کے مطابق لاہور ،فیصل آباد ،گجرانوالہ ،راولپنڈی ،ملتان ،بہاولپور ،سرگودھا ،ڈیرہ غازی خان اور ساہیوال میں شدید گرمی اور ہیٹ ویو کی صورتحال رہے گی۔

ساتھ پنجاب کے اضلاع بہاولپور ،رحیم یار خان ،ڈیرہ غازی خان اور ملتان میں ہیٹ ویو کی لہر شدید ہو سکتی ہے۔ترجمان کے مطابق گزشتہ روز ڈیرہ غازی خان اور نور پور تھل میں سب سے زیادہ درجہ حرارت 49ڈگری سینٹی گریڈ ریکارڈ کیا گیا ۔بھکر ،بہاولنگر ،گجرانوالہ ،کوٹ ادو ،منڈی بہائوالدین اور سرگودھا میں 47ڈگری درجہ حرارت ریکارڈ کیا گیا ۔

(جاری ہے)

لاہور ،فیصل آباد ،گجرات ،خان پور ،ملتان ،اوکاڑہ ،رحیم یار خان ،سیالکوٹ ،ٹوبہ ٹیک سنگھ سمیت پنجاب کے میدانی علاقوں میں تقریبا 45ڈگری تک درجہ حرارت ریکارڈ کیا گیا ۔

ریلیف کمشنر پنجاب نبیل جاوید نے کمشنرز و ڈپٹی کمشنرز کو الرٹ رہنے کی ہدایت کرتے ہوئے کہا کہ وزیر اعلی پنجاب کی ہدایات کے پیش نظر متعلقہ ادارے الرٹ رہیں۔ عوامی مقامات لاری اڈوں اور منڈیوں میں ٹھنڈے پانی کی فراہمی کو یقینی بنایا جائے ۔ڈی جی پی ڈی ایم اے عرفان علی کاٹھیا نے کہا کہ چولستان کے اضلاع میں صاف پانی کی فراہمی کو یقینی بنایا جا رہا ہے ،تمام ہسپتالوں میں ہیٹ ویو کائونٹرز قائم ہیں۔

پی ڈی ایم اے پنجاب نے ہیٹ سٹروک سے بچائو کیلئے متعلقہ ادویات کی فراہمی یقینی بنانے کی ہدایت کی ہے ۔ ڈی جی پی ڈی ایم اے نے کہا کہ میڈیا کے ذریعے شہریوں کو ہیٹ ویو کے خطرات سے آگاہ کیا جا رہا ہے،عوام الناس سے التماس ہے کہ احتیاطی تدابیر اختیار کریں،بچوں بزرگوں اور بیمار افراد کا خاص خیال رکھیں ،گرمی کی لہر کے اثرات معمر افراد بچوں اور بیماروں پر زیادہ ہو سکتے ہیں ،سخت دھوپ میں مشقت اور ورزش سے گریز کریں ، غیر ضروری گھر سے باہر نہ نکلیں ،ہلکے رنگ کا سوتی لباس پہنیں ۔ایمرجنسی صورتحال میں پی ڈی ایم اے ہیلپ لائن 1129پر کال کریں ۔