چیف جسٹس آ ف پاکستان جسٹس یحییٰ آفریدی کی مسلم ورلڈ لیگ کے سیکرٹری جنرل اور تنظیم علماء المسلمین کے چیئرمین شیخ ڈاکٹر محمد العیسیٰ سے ملاقات

اسلام آباد (اُردو پوائنٹ اخبارتازہ ترین - اے پی پی۔ 10 جون2025ء) چیف جسٹس آ ف پاکستان جسٹس یحییٰ آفریدی نے مسلم ورلڈ لیگ کے سیکرٹری جنرل اور تنظیم علماء المسلمین کے چیئرمین شیخ ڈاکٹر محمد العیسیٰ سے ملاقات کی جس میں اسلامی نظام عدل اور عالمی چیلنجز پر تبادلہ خیال کیا گیا۔منگل کو سپریم کورٹ کے شعبہ تعلقات عامہ کے جاری اعلامیہ کے مطابق مقدس شہر مکہ مکرمہ میں10 جون 2025 کو حج کی سعادت حاصل کرنے کے بعد چیف جسٹس آف پاکستان جسٹس یحییٰ آفریدی کو شیخ ڈاکٹر محمد العیسیٰ، سیکرٹری جنرل مسلم ورلڈ لیگ اور چیئرمین تنظیم علماء المسلمین نے پرتپاک خیرمقدم کیا۔

اس اعلیٰ سطحی ملاقات میں اسلامی نظام عدل کے بنیادی اصولوں اور دنیا بھر میں اس پر عملدرآمد کو درپیش چیلنجز پر تفصیلی گفتگو کی گئی۔

(جاری ہے)

دونوں رہنمائوں نے اس بات کا اعتراف کیا کہ اسلام میں عدل کو معاشرتی استحکام، انسانی وقار اور عالمی امن کے لیے مرکزی حیثیت حاصل ہے۔ انہوں نے اس بات پر زور دیا کہ انصاف، مساوات اور قانون کی حکمرانی کو اسلامی تعلیمات کے مطابق فروغ دینا وقت کی اہم ترین ضرورت ہے،بالخصوص جب دنیا بھر میں عدالتی نظام دبائو کا شکار ہیں۔

شیخ ڈاکٹر محمد العیسیٰ نے اس موقع پر کہا کہ مسلم ورلڈ لیگ انصاف کے فروغ کو ایک آفاقی قدر کے طور پر اسلامی اصولوں کی روشنی میں فروغ دینے کے لیے پرعزم ہے۔ انہوں نے کہا کہ انصاف صرف ایک قانونی تصور نہیں بلکہ اسلام میں ایک اخلاقی فرض ہے۔ موجودہ عالمی منظرنامے میں انصاف سے دوری ہم سب سے مشترکہ اقدام کا تقاضا کرتی ہے، تاکہ مذہبی، قانونی اور سیاسی قائدین مل کر منصفانہ حکمرانی اور انسانی حقوق پر اعتماد بحال کریں۔

چیف جسٹس آف پاکستان نے ان خیالات کی تائید کرتے ہوئے پاکستان کے عدالتی نظام کی دیانتداری اور اسلامی قانونی اصولوں کے عصری اطلاق کے لیے عزم کا اعادہ کیا۔ انہوں نے کہا کہ اسلام کی تعلیمات انصاف کا ایک لازوال فریم ورک فراہم کرتی ہیں اور بطور قانون دان ہمارا فرض ہے کہ ان اصولوں کو جدید پیچیدگیوں کے باوجود برقرار رکھیں۔ علمائے کرام اور عدالتی اداروں کے درمیان تعاون نظامی ناانصافیوں کے خاتمے کے لیے ناگزیر ہے۔

چیف جسٹس نے مزید کہا کہ پاکستان جو مختلف حیثیتوں میں سعودی عدالتی نظام سے منسلک رہا ہے، یتیموں و بیوائوں کے حقوق، وراثت کے معاملات، اور معاہداتی ذمہ داریوں کے حوالے سے شیخ ڈاکٹر محمد العیسیٰ کے تجربے سے سیکھنے کا خواہاں ہے۔اس ملاقات میں مسلم ورلڈ لیگ اور سپریم کورٹ آف پاکستان کے درمیان تعلیم و تربیت اور قانونی اصلاحات کے شعبوں میں تعاون کو فروغ دینے پر بھی غور کیا گیا تاکہ انصاف اور اخلاقی حکمرانی کو مضبوط بنایا جا سکے۔

دونوں رہنمائوں نے اس امر پر اتفاق کیا کہ اسلامی اقدار کے مطابق عدالتی نظام کو مضبوط بنانے کے لیے مسلم ممالک کے درمیان مکالمے کو فروغ دینا ناگزیر ہے۔چیف جسٹس آف پاکستان کی دعوت پر شیخ ڈاکٹر محمد العیسیٰ نے پاکستان کا دورہ کرنے اور عدلیہ سے ادارہ جاتی سطح پر روابط قائم کرنے پر آمادگی ظاہر کی، خاص طور پر اسلاموفوبیا اور بین المذاہب مکالمے کے موضوعات پر علمی تبادلہ خیال کے لیے۔یہ ملاقات نہایت خوشگوار ماحول میں ہوئی اور مستقبل میں مکالمے اور باہمی تعاون کے نئے در وا کرنے کا ذریعہ بنے گی۔