سرکاری ملازمین کی تنخواہوں میں اضافہ اور تنخواہ دار ملازمین کیلئے ٹیکس میں کمی کی تجاویز ہمارے شیڈو بجٹ کا حصہ تھی،فاروق ستار

منگل 10 جون 2025 23:40

اسلام آباد (اُردو پوائنٹ اخبارتازہ ترین - اے پی پی۔ 10 جون2025ء) متحدہ قومی موومنٹ کے رہنما فاروق ستار نے کہا ہے کہ سرکاری ملازمین کی تنخواہوں میں اضافہ اور تنخواہ دار ملازمین کیلئے ٹیکس میں کمی کی تجاویز ہمارے شیڈو بجٹ کا حصہ تھی۔ منگل کو پارلیمنٹ ہائوس کے باہر میڈیا سے گفتگو کرتے ہوئے انہوں نے بجٹ کے حوالہ سے اپنی تجاویز کا حوالہ دیتے ہوئے کہاکہ ہم نے حکومت کو ایک شیڈو بجٹ ہر سال کی طرح پہلے ہی پیش کر دیا تھا جس میں تنخواہوں میں اضافے اور ٹیکس میں کمی کی تجاویز شامل تھیں، ہمارے مطالبے پر حکومت نے عمل کیا ہے جس پر ان کے شکر گزار ہیں۔

انہوں نے کہاکہ ہم نے بجلی اور گیس کی قیموں میں کمی کی بھی تجاویز دے رکھی ہیں، امید ہے کہ ان پر بھی عمل ہوگا اور لوگوں کو ریلیف ملے گا۔

(جاری ہے)

انہوں نے کہاکہ پٹرولیم لیوی کو کم گیا ہے لیکن کاربن ٹیکس لگایا گیا ہے جس سے عام آدمی کی زندگی پر اثر پڑے گا، اس لئے ہم وزیراعظم اور وزیر خزانہ سے ملاقات کر کے اپنے شیڈو بجٹ کی تجاویز ایک دفعہ پھر حکومت کے سامنے رکھیں گے۔

انہوں نے کہاکہ تنخواہ دار طبقہ کیلئے یہ بجٹ تازہ ہوا کا جھونکا ہے، ان کی تنخواہ کے ساتھ سیلنگ میں بھی اضافہ ہوا ہے جو ایک بڑا ریلیف ہے۔ فاروق ستار نے کہاکہ ضم شدہ اضلاع کو 68 ارب دینے پر خوشی ہے، اسی طرح آزاد کشمیر اور گلگت بلتستان کیلئے بھی فنڈ رکھے گئے ہیں جو خوش آئند ہے۔ ہمارا مطالبہ ہے کہ آبادی کی بنیاد پر کراچی کو بھی اس کا جائز حصہ ملنا چاہئے۔