Live Updates

اراکین پارلیمنٹ کا عوامی بہبود کو ترجیح دینے والا ایک ’’قابل تعریف‘‘بجٹ پیش کرنے پر حکومت کو خراج تحسین

بدھ 11 جون 2025 00:20

اسلام آباد (اُردو پوائنٹ اخبارتازہ ترین - اے پی پی۔ 11 جون2025ء) پارلیمانی سیکرٹری فرح ناز اکبر نے ملک کے مشکل معاشی حالات کے باوجود بجٹ کو ’’عمدہ‘‘ اور ’’عوام دوست‘‘قرار دیا ہے۔ پارلیمنٹ ہاؤس کے باہر میڈیا سے بات کرتے ہوئے انہوں نے کہا کہ بجٹ انتہائی مشکل حالات میں پیش کیا گیا، جس میں 6 مئی کی پاک بھارت جنگ کے بعد کے حالات اور بین الاقوامی مالیاتی فنڈ (آئی ایم ایف) کی شرائط شامل ہیں۔

انہوں نے دباؤ کے باوجود عوامی بہبود کو ترجیح دینے والے ایک ’’قابل تعریف‘‘ بجٹ پیش کرنے پر حکومت کی تعریف کی۔ انہوں نے کہا کہ یہ بجٹ ملک کی بہتری کے لیے ہے،ہمیں بحیثیت پاکستانی قوم مل کر کام کرنا ہوگا تاکہ ہم اپنے ملک کو استحکام اور ترقی کی طرف لے جا سکیں۔ دوسری جانب پاکستان پیپلز پارٹی (پی پی پی) کی رکن ثمینہ خالد گھرکی نے بھی وفاقی بجٹ کی تعریف کرتے ہوئے محدود مالی وسائل کے باوجود اسے قابل ستائش قرار دیا۔

(جاری ہے)

انہوں نے بجٹ کی اہم خصوصیات پر روشنی ڈالتے ہوئے سرکاری ملازمین کی تنخواہوں میں 10 فیصد اضافے کو قابل تحسین اقدام قرار دیا۔ انہوں نے پنشن میں 7 فیصد اضافے کو بھی سراہا، جسے انہوں نے ریٹائرڈ ملازمین اور معاشرے کے کمزور طبقات کی ریلیف کا قدم قرار دیا،یہ مشکل حالات میں پیش کیا گیا ایک بہترین بجٹ ہے،اگر عوام متحد ہو کر ان اقدامات کی حمایت کرے تو ہم کامیابی حاصل کر سکتے ہیں اور ملک کو ترقی کی راہ پر گامزن کر سکتے ہیں۔