بجٹ 26-2025، جی ایس ٹی میں اضافے سے کون سی گاڑیوں کی قیمتیں 14 لاکھ روپے تک بڑھ جائیں گی؟

حکومت کی جانب سے آئندہ مالی سال کے دوران تمام گاڑیوں پر یکساں 18 فیصد جنرل سیلز ٹیکس نافذ کرنے کی تیاریاں

محمد علی بدھ 11 جون 2025 19:22

بجٹ 26-2025، جی ایس ٹی میں اضافے سے کون سی گاڑیوں کی قیمتیں 14 لاکھ روپے ..

لاہور (اُردو پوائنٹ اخبارتازہ ترین۔ 11 جون2025ء) حکومت کی جانب سے آئندہ مالی سال کے دوران تمام گاڑیوں پر یکساں 18 فیصد جنرل سیلز ٹیکس نافذ کرنے کی تیاریاں، بجٹ 26-2025، جی ایس ٹی میں اضافے سے کون سی گاڑیوں کی قیمتیں 14 لاکھ روپے تک بڑھ جائیں گی؟۔ تفصیلات کے مطابق چند روز بعد ملک میں گاڑیوں کی قیمتوں میں لاکھوں روپے اضافے کا امکان ہے۔ وفاقی حکومت نے مالی سال 26-2025 کے بجٹ میں ہائبرڈ گاڑیوں پر جنرل سیلز ٹیکس 18 فیصد کرنے کی تجویز پیش کی ہے جس کے بعد ان گاڑیوں کی قیمتوں میں 10 سے 14 لاکھ روپے تک اضافہ ہوجائے گا۔

ایک رپورٹ کے مطابق وفاقی حکومت نے 2025-26 کے بجٹ میں ہائبرڈ گاڑیوں پر جنرل سیلز ٹیکس میں نمایاں اضافے کی تجویز پیش کی ہے، جس کے تحت ٹیکس کی شرح موجودہ 8.5 فیصد سے بڑھا کر 18 فیصد کردی جائے گی۔

(جاری ہے)

اس تبدیلی کے نتیجے میں پاکستان میں دستیاب کئی مقبول ہائبرڈ ماڈلز کی قیمتوں میں نمایاں اضافہ ہوگا۔وسیع تر ٹیکس اصلاحات کے تحت، حکومت کا ارادہ ہے کہ تمام گاڑیوں پر 18 فیصد کی یکساں شرح سے جی ایس ٹی لاگو کیا جائے، خواہ وہ پٹرول، ڈیزل ہوں، یا ہائبرڈ ہوں۔

قبل ازیں ہائبرڈ گاڑیوں کی خرید کی جانب ترغیب دینے کے لیے ان پر جی ایس ٹی کی شرح 8.5 فیصد رکھی گئی تھی، نئی پالیسی اس رعایت کو ختم کر دے گی۔پاک وہیلز کے مرتب کردہ اعداد و شمار کے مطابق، اگر یہ تجویز نافذ ہوتی ہے تو مختلف ہائبرڈ گاڑیوں کی قیمتوں میں 10 لاکھ سے 14 لاکھ روپے تک اضافہ ہوجائے گا۔ گاڑیوں میں جی ایس ٹی میں مجوزہ اضافے نے آٹو مینوفیکچررز اور ممکنہ خریداروں، دونوں میں تشویش پیدا کر دی ہے، ہائبرڈ گاڑیاں، جنہیں اکثر ایندھن کی بچت اور ماحول دوست آپشن کے طور پر پیش کیا جاتا ہے، نئے ٹیکس نظام کے تحت نمایاں طور پر مہنگی ہوجائیں گی۔

آٹو انڈسٹری کے ماہرین خبردار کرتے ہیں کہ یہ اقدام ہائبرڈ گاڑیوں کی مانگ کو کم کر سکتا ہے اور ملک کی ماحول دوست گاڑیوں پر منتقلی کے عمل کی رفتار کو سست کر سکتا ہے۔