Live Updates

ایران پر حملہ جارحیت، اقوام متحدہ حملے بند کروائی: عوامی تحریک

اوآئی سی بھی اپنا کردار ادا کرے، جنگ پھیلی تو ایک اور انسانی المیہ جنم لے سکتا ہے

جمعہ 13 جون 2025 22:03

لاہور (اُردو پوائنٹ اخبارتازہ ترین - آن لائن۔ 13 جون2025ء) پاکستان عوامی تحریک کے سیکرٹری جنرل خرم نواز گنڈاپور نے کہا ہے کہ ایران پر حملہ جارحیت اور قابل مذمت ہے۔ جنگ کی روک تھام کے لئے اقوام متحدہ اپنا کردار ادا کرے۔ اگر جنگ پھیلی تو غزہ کے بعد ایک اور بڑا انسانی المیہ جنم لے سکتا ہے۔ انہوں نے کہا کہ عالم اسلام اوآئی سی کی طرف دیکھ رہا ہے،او آئی سی یہ حملے بند کروائے، کسی بھی ملک کے خلاف جارحیت بین الاقوامی قوانین کی سنگین خلاف ورزی ہے۔

(جاری ہے)

تمام مسائل مذاکرات کے ذریعے حل ہونے چاہئیں۔ انہوں نے کہا کہ مسلمان ملک بھی اس جارحیت کے خلاف آواز اٹھائیں۔ انہوں نے کہا کہ ایران نے ہمیشہ اپنی عالمی ذمہ داریوں کو پورا کیا ہے اس وقت بھی ایران امریکہ کے ساتھ مذاکرات کی میز پر بیٹھا ہوا ہے، ایران حل طلب امور پر بات چیت پر آمادہ ہے لہٰذا مذاکرات کو ترجیح دینی چاہئے، امریکہ کو چاہئے کہ وہ امن عمل کی بحالی کے لئے اپنا کردار ادا کرے۔ امریکہ نے حال ہی میں پاک بھارت سیز فائر کروانے میں اپنا کردار ادا کیا تھا وہی کردار یہاں بھی ادا کرے۔