Live Updates

پاکستان کے خلاف بھارت اور اسرائیل کا گٹھ جوڑ بے نقاب، بلوچستان کے نام پر سازش

اسرائیل سے منسلک ’’میمری‘‘ نامی ویب سائٹ کی پاکستان مخالف مہم اور بھارت سے اس کا گٹھ جوڑ منظر عام پر آگیا

ہفتہ 14 جون 2025 13:22

اسلام آباد،نئی دہلی (اُردو پوائنٹ اخبارتازہ ترین - این این آئی۔ 14 جون2025ء)پاکستان کے خلاف ایک اور گھناؤنی سازش کا پردہ چاک ہوگیا ہے۔ اسرائیل سے منسلک ’’میمری‘‘ نامی ویب سائٹ کی پاکستان مخالف مہم اور بھارت سے اس کا گٹھ جوڑ منظر عام پر آگیا ہے۔ ’’بلوچستان اسٹڈیز پراجیکٹ‘‘ کے نام سے چلائی جانے والی اس پروپیگنڈا مہم میں دہلی اور تل ابیب کے خفیہ اتحاد کے شواہد سامنے آگئے ہیں، جس میں میر یار بلوچ جیسے جعلی کرداروں کو سامنے لا کر پاکستان کے خلاف نفرت انگیز مواد پھیلایا جا رہا ہے۔

ذرائع کے مطابق میر یار بلوچ درحقیقت ایک بھارتی مہرہ ہے جسے ’’بلوچستان اسٹڈیز پراجیکٹ‘‘ کا خصوصی مشیر نامزد کیا گیا ہے۔ یہ کردار ایک مصنوعی شناخت ہے جس کے پیچھے بھارتی خفیہ ایجنسی ’’را‘‘ کی سرپرستی موجود ہے، جبکہ اسرائیلی تھنک ٹینک ’’میمری‘‘ (Middle East Media Research Institute) واشنگٹن سے اس منصوبے کی نظریاتی آبیاری کر رہا ہے۔

(جاری ہے)

یہ بھی انکشاف ہوا ہے کہ بی ایل اے اور دیگر دہشتگرد تنظیموں کی بھارتی حمایت ایک عرصے سے عالمی اداروں میں رپورٹ ہو چکی ہے، اور اب اسرائیلی شمولیت نے اس اتحاد کی حقیقت اور بھی نمایاں کر دی ہے۔

’’بلوچستان اسٹڈیز پراجیکٹ‘‘ جیسے جعلی تحقیقی پلیٹ فارمز کا مقصد صرف اور صرف پاکستان کے خلاف عالمی سطح پر منفی بیانیہ پھیلانا اور محب وطن بلوچ عوام کو گمراہ کرنا ہے۔تجزیہ کاروں کے مطابق ففتھ جنریشن ہائبرڈ وارفیئر کے اس دور میں دشمن صرف سرحدوں پر نہیں، ہماری اسکرینز اور ڈیجیٹل اسپیس میں بھی موجود ہے۔ دشمن نے ’’بلوچ حقوق‘‘ کا لبادہ اوڑھ کر ایک گمراہ کن بیانیہ تخلیق کیا ہے تاکہ عوام کو تقسیم کیا جا سکے۔

بلوچ عوام سے اپیل کی جا رہی ہے کہ وہ ایسے کٹھ پتلی کرداروں اور ان کے بیرونی آقاؤں کو مکمل طور پر مسترد کریں۔ یہ نام نہاد پراجیکٹس نہ صرف بلوچوں کی قربانیوں کی توہین ہیں بلکہ پاکستان کی سالمیت کے خلاف نفسیاتی اور نظریاتی حملہ بھی ہیں۔پاکستانی عوام اور اداروں کو چاہیے کہ وہ اس ڈیجیٹل جنگ میں بھی دشمن کے عزائم کو پہچانیں، یکجہتی کے ساتھ ہر سازش کو ناکام بنائیں اور بلوچستان کے نام پر کھیلنے والے دشمنوں کو منہ توڑ جواب دیں۔