خلیفہ سوم حضرت عثمان غنیؓ کے عہدِ خلافت میں دینِ اسلام اور علوم و فنون نے بے مثال ترقی کی، پروفیسر حافظ عبد الصمد طاہر

ملتان (اُردو پوائنٹ اخبارتازہ ترین - اے پی پی۔ 14 جون2025ء) گورنمنٹ ولائیت حسین اسلامیہ گریجویٹ کالج ملتان کے پرنسپل پروفیسر حافظ عبد الصمد طاہر، ماہر تعلیم پروفیسر ڈاکٹر ریاض حسین اور سماجی رہنما و صدر ینگ پاکستانیز آرگنائزیشن نعیم اقبال نعیم نے کہا ہے کہ خلیفہ سوم حضرت عثمان غنیؓ کے عہدِ خلافت میں دینِ اسلام اور علوم و فنون نے بے مثال ترقی کی، حضرت عثمانِ غنی رضی اللہ تعالیٰ عنہ کی شہادت تاریخ اسلام کی سب سے معصوم شہادت ہے، حضرت عثمان غنی رضی اللہ تعالیٰ عنہ نے دین اسلام کی ترویج میں اہم کردار ادا کیا،آپ کی سخاوت کی کوئی مثال نہیں ملتی، آپ نے قرآن پاک کو مجتمع کیا۔

ان خیالات کا اظہار انہوں نے یوم شہادت حضرت عثمان غنی رضی اللہ تعالیٰ عنہ کے سلسلے میں ینگ پاکستانیز آرگنائزیشن ملتان اور گورنمنٹ ولائیت حسین اسلامیہ گریجویٹ کالج ملتان کے زیر اہتمام،ڈی ایس جی انرجی پرائیویٹ لمیٹڈ پاکستان کے تعاون سے منعقدہ ذوالنورین کانفرنس سے خطاب کرتے ہوئے کیا۔

(جاری ہے)

کانفرنس کی صدارت پرنسپل گورنمنٹ ولائیت حسین اسلامیہ گریجویٹ کالج ملتان پروفیسر حافظ عبد الصمد طاہر نے کی جبکہ مہمانان گرامی میں صدر ینگ پاکستانیز آرگنائزیشن نعیم اقبال نعیم، ماہر تعلیم پروفیسر ڈاکٹر ریاض حسین، مذہبی سکالر ممبر ضلعی امن کمیٹی پروفیسر عبد الماجد وٹو شامل تھے۔

کانفرنس میں سماجی رہنما جنرل سیکرٹری روہی ڈویلپمنٹ آرگنائزیشن جواد امین قریشی، سیاسی و سماجی رہنما اسلم طاہر انصاری، الحاج محمد اشرف قریشی، پروفیسر محمود حسین ڈوگر، قاری حامد رسول سیفی ،ممبر ینگ پاکستانیز آرگنائزیشن ہمایوں واجد اور کالج کے اساتذہ کرام اور طلبہ نے کثیر تعداد میں شرکت کی۔اس موقع پر خطاب کرتے ہوئے پروفیسر حافظ عبد الصمد طاہر نے کہا کہ حضرت عثمان غنی رضی اللہ تعالیٰ عنہ بڑی حیاءوالے تھے، حضور اکرم محمد صلی اللہ علیہ وآلہ وسلّم نے فرمایا کہ میں اس سے کیوں حیاءنا کروں جس سے فرشتے بھی حیاءکرتے ہیں۔

صدر ینگ پاکستانیز آرگنائزیشن نعیم اقبال نعیم نے کہا کہ حضرت عثمان غنی کی زندگی کے تین پہلو بڑے نمایاں ہیں پہلا حضرت عثمان غنی رضی اللہ تعالی عنہ سخی تھے اور بہت زیادہ سخاوت کرتے تھے،دوسرا وہ بہت زیادہ شرم و حیا والے اور تیسرا اللہ تعالیٰ سے بہت زیادہ ڈرنے والے تھے، یہ تین خوبیاں جس مسلمان کے اندر پیدا ہو جاتی ہیں وہ خوبصورت مسلمان بن جاتا ہے،اللہ ہمیں ان کے راستوں کا مسافر بنانے اور ان کے اسوہ حسنہ پر چلنے کی توفیق عطا کرے۔

ڈاکٹر ریاض حسین، پروفیسر عبد الماجد وٹو، پروفیسر محمود حسین ڈوگر، جواد امین قریشی اور محمد اشرف قریشی نے کہا کہ آج امت مسلمہ کو جو مسائل درپیش ہیں اس کی سب سے بڑی وجہ دین سے دوری ہے،خلفائے راشدین کے ادوار حکومتوں کو دیکھیں تو وہ ہمارے لئے مشعل راہ ہیں،اگر ہم ان کی طرزِ زندگی اپنا لیں تو ہم آج پھر دنیا پر راج کرسکتے ہیں۔تقریب کے اختتام پر فلسطین، ایران، اردن، شام اور کشمیر کے مسلمانوں جبکہ پاکستان کی سلامتی کیلئے خصوصی دعا کی گئی۔