امریکہ نے مزید 36 ممالک پر سفری پابندیاں لگانے کی تیاری کرلی

پابندی کی زد میں آنے والے ممالک کو امریکی شرائط کو پورا کرنے کے لیے 60 دن کی مہلت دے دی گئی

ساجد علی پیر 16 جون 2025 10:36

امریکہ نے مزید 36 ممالک پر سفری پابندیاں لگانے کی تیاری کرلی

واشنگٹن ( اُردو پوائنٹ اخبارتازہ ترین۔ 16 جون 2025ء ) امریکہ کی جانب سے مزید 36 ممالک پر سفری پابندیاں لگانے کی تیاری کرلی گئی۔ غیر ملکی خبر رساں ادارے رائٹرز کے مطابق صدر ڈونلڈ ٹرمپ کی انتظامیہ نے امریکہ میں داخلے پر عائد سفری پابندیوں کا دائرہ مزید 36 ممالک تک بڑھانے پر غور شروع کر دیا ہے، اس ضمن میں امریکی محکمہ خارجہ کی ایک خفیہ کیبل کا حوالہ دیتے ہوئے بتایا گیا ہے کہ یہ ممکنہ اقدام صدر ٹرمپ کی غیر قانونی امیگریشن کے خلاف مہم کا اگلا مرحلہ ہو گا۔

معلوم ہوا ہے کہ امریکہ کی اس نئی پالیسی کے تحت جن ممالک کو پابندیوں کا سامنا ہو سکتا ہے ان میں 25 افریقی ممالک کا ذکر کیا جارہا ہے جن میں امریکہ کے قریبی اتحادی مصر اور جیبوتی بھی شامل ہیں، اس کے علاوہ کیریبین، وسطی ایشیاء اور بحرالکاہل کے جزائر بھی ممکنہ طور پر اس پابندی کی زد میں آسکتے ہیں، پابندی کی زد میں آنے والے ممالک کو 60 دن کی مہلت دی گئی ہے تاکہ وہ امریکی شرائط کو پورا کریں اور غیر قانونی امیگریشن پر قابو پالیں۔

(جاری ہے)

ٹرمپ انتظامیہ نے ایک یادداشت میں کہا ہے کہ متعدد ممالک کے شہریوں کی بڑی تعداد ایسی ہے جو ویزے کی مدت ختم ہونے کے باوجود امریکہ میں مقیم ہے، بعض شہریوں کے بارے میں خدشہ ہے کہ وہ امریکہ مخالف سرگرمیوں میں ملوث رہے ہیں، اگر کوئی ملک تیسرے ملک کے شہریوں کو واپس قبول کرنے پر رضامند ہو جاتا ہے تو امریکہ اس پر عائد ویزہ پابندیاں نرم کرسکتا ہے۔ یہاں قابل ذکر بات یہ ہے کہ ابھی چند روز قبل ہی امریکی صدر ڈونلڈ ٹرمپ ایک ایگزیکٹو آرڈر پر دستخط کرچکے ہیں جس کے ذریعے 12 ممالک کے شہریوں کے امریکہ داخلے پر پابندی عائد کی گئی، اس موقع پر امریکی صدر نے کہا کہ یہ اقدام امریکی شہریوں کو غیرملکی دہشت گردوں اور قومی سلامتی کے دیگر خطرات سے محفوظ رکھنے کے لیے ناگزیر ہے۔