Live Updates

عالمی برادری اسرائیلی جارحیت روکنے کیلئے اقدامات کرے، دانیال چوہدری

حکومت نے وفاقی بجٹ میں آئی ایم ایف کی سخت شرائط کے باوجود ہرممکن ریلیف دیا، پارلیمانی سیکرٹری

پیر 16 جون 2025 23:02

اسلام آباد (اُردو پوائنٹ اخبارتازہ ترین - این این آئی۔ 16 جون2025ء) پارلیمانی سیکرٹری اطلاعات و نشریات بیرسٹر دانیال چوہدری نے کہا ہے کہ اسرائیل جس کی لاٹھی اس کی بھینس کی پالیسی پر گامزن ہے جو کسی کو قابل قبول نہیں، عالمی برادری کو چاہئے کہ اسرائیلی جارحیت کو روکنے کیلئے اقدامات کرے جو خطے کو عدم استحکام کا شکار کر سکتی ہے، حکومت نے وفاقی بجٹ میں آئی ایم ایف کی سخت شرائط کے باوجود ہرممکن ریلیف دیا ہے، اتحادیوں اور اپوزیشن کی مثبت تجاویز کا بھی خیر مقدم کریں گے۔

پیر کو پارلیمنٹ ہائوس کے باہر میڈیا سے گفتگو کرتے ہوئے بیرسٹر دانیال چوہدری نے کہا کہ جس طرح آئی ایم ایف نے کڑی شرائط لاگو کر رکھی ہیں، اس کے باوجود حکومت عوام کو ریلیف دینے کیلئے کوشاں ہے۔

(جاری ہے)

انہوں نے کہا کہ پاکستان ترقی کی جانب بڑھ رہا ہے، ملک کے معاشی اشاریے بڑھوتی کی نشاندہی کر رہے ہیں۔ رواں مالی سال کے بجٹ میں جو اہداف مقرر کئے گئے تھے وہ پورے کئے گئے ہیں۔

نئے بجٹ میں کوئی نئے ٹیکس نہیں لگے، زیادہ سے زیادہ ریلیف دیا گیا ہے، امید ہے آئی ایم ایف کی کڑی شرائط کا یہ آخری بجٹ ہو گا اور مستقبل میں مزید بہتر بجٹ دیں گے۔ ایک سوال کے جواب میں انہوں نے کہا کہ کوئی بجٹ پرفیکٹ نہیں ہوتا ہر بجٹ میں بہتری کی گنجائش ہوتی ہے، اتحادیوں اور اپوزیشن نے جو تحفظات بجٹ کے حوالے سے پیش کئے ہیں، انہیں دور کرنے کی کوشش کریں گے۔ انہوں نے کہا کہ اسرائیل کے ایران کے خلاف جارحانہ عمل سے خطہ عدم استحکام کا شکار ہو گا، عالمی برادری کو چاہئے کہ اسرائیل کی دوسرے ممالک پر جارحیت کی پالیسی کو ترک کرائے اور یہ عمل اب رکنا چاہئے کیونکہ یہ پالیسی کسی کو قبول نہیں۔