سولر پر 18 فیصد ٹیکس واپس لیا جائے، تعلیم اور صحت کا بجٹ جی ڈی پی کے 4 فیصد تک کیا جائے، شاہدہ اخترعلی

منگل 17 جون 2025 15:20

اسلام آباد (اُردو پوائنٹ اخبارتازہ ترین - اے پی پی۔ 17 جون2025ء) جے یو آئی (ف) کی رکن قومی اسمبلی شاہدہ اختر علی نے مطالبہ کیا ہے کہ سولر پر 18 فیصد ٹیکس واپس لیا جائے، تعلیم اور صحت کا بجٹ جی ڈی پی کے 4 فیصد تک کیا جائے، بٹ کوائن اور پیپر لیس کرنسی کو اگر رائج کرنا ہے تو اس کیلئے جامع پالیسی اور میکنزم تشکیل دیا جائے۔ منگل کو قومی اسمبلی میں بجٹ پر بحث میں حصہ لیتے ہوئے انہوں نے کہا کہ بجٹ کے اعداد و شمار آئی ایم ایف کے گرد ہی گھوم رہے ہیں۔

انہوں نے کہا کہ ہمیں یقین دلایا جائے کہ ہم جو تجاویز یہاں پر دے رہے ہیں کیا انہیں بجٹ میں شامل کر کے بجٹ کا حصہ بنایا جائے گا۔ انہوں نے کہا کہ اسرائیل ایران تنازعہ کی ہم سخت مذمت کرتے ہیں، اس صورتحال میں عالم اسلام کو امت مسلمہ بن کر آگے بڑھنا ہوگا۔

(جاری ہے)

انہوں نے کہا کہ عوام نے قابل تجدید توانائی سولر انرجی کے ذریعے اگر اپنی بجلی کی ضروریات پوری کرنے کا فیصلہ کیا ہے تو اس پر 18 فیصد ٹیکس نہیں لگانا چاہئے۔

انہوں نے کہا کہ تعلیم اور صحت کا بجٹ ناکافی ہے، تعلیم اور صحت کا بجٹ جی ڈی پی کے چار فیصد تک رکھا جائے۔ انہوں نے کہا کہ ہمیں تعلیمی سٹرکچر مکمل تبدیل کر کے روزگار کے مواقع پیدا کرنے چاہئیں۔ انہوں نے مطالبہ کیا کہ یوتھ لون کا طریقہ کار آسان بنایا جائے، نوجوان مایوسی کا شکار ہیں ملک سے برین ڈرین کو روکنا چاہئے۔ انہوں نے کہا کہ بٹ کوائن اور پیپر لیس کرنسی کو اگر رائج کرنا ہے تو اس کیلئے ایک جامع پالیسی اور میکنزم بنایا جائے۔ آئی ٹی سے وابستہ ہمارے نوجوانوں کو پے پال کی سہولت فراہم کی جائے۔