راولپنڈی، بھائی نے جیٹھ کے ساتھ مل کر غیرت کے نام پر بہن کو قتل کر ڈالا

مقتولہ کی شادی فیصل محمود سے ہوئی جس سے تین سالہ بیٹی اور ڈیڑھ سالہ بیٹا بھی ہے، خاوند نجی ہوٹل میں تندور پر ملازمت کرتا ہے، بھائی اور جیٹھ کو مقتولہ کا مختلف لوگوں سے ملنا پسند نہیں تھا، پولیس نے واقعہ کا مقدمہ درج کرلیا

فیصل علوی منگل 17 جون 2025 13:50

راولپنڈی، بھائی نے جیٹھ کے ساتھ مل کر غیرت کے نام پر بہن کو قتل کر ڈالا

راولپنڈی(اردوپوائنٹ اخبار تازہ ترین۔17جون 2025)راولپنڈی میں تھانہ روات کے علاقے ڈھوک غلام علی میں بھائی نے جیٹھ کے ساتھ مل کربہن کو غیرت کے نام پر تشدد کا نشانہ بناتے ہوئے فائرنگ کرکے قتل کر ڈالا،پولیس کی جانب سے واقعہ کا مقدمہ درج کرلیاگیا جبکہ ملزمان کی تلاش کیلئے چھاپے مارے جارہے ہیں،ایکسپریس نیوز کے مطابق اے ایس آئی اسد علی کے مطابق ساتھی اہلکاروں کے ساتھ انسداد جرائم کی خاطر گشت پر تھا کہ اچانک ڈھوک فرمان علی کی جانب سے فائرنگ اور شور کی آواز آئی۔

دیکھا تو فیصل محمود کے مکان سے دو افراد مسلح حالت میں نکلے، پولیسں کو دیکھتے اور تعاقب پر دونوں مسلح افراد گلیوں میں فرار ہوگئے۔پولیس کے مطابق مقتولہ کی شادی خاندان میں ہی فیصل محمود سے ہوئی جس سے تین سالہ بیٹی اور ڈیڑھ سالہ بیٹا بھی ہے۔

(جاری ہے)

مقتولہ کا خاوند نجی ہوٹل میں تندور پر ملازمت کرتا ہے، بھائی اور جیٹھ کو مقتولہ کا مختلف لوگوں سے ملنا پسند نہیں تھا۔

مقدمے کے متن کے مطابق مکان کی اندر جاکر دیکھا تو خاتون زہرش فیصل شدید زخمی ہوکر دم توڑ چکی تھی اور لاش صوفے پر پڑی تھی۔ فرار ہونے والے ملزمان میں سے نفیس اختر کی شناخت مقتولہ کے بھائی اور نوید کیانی کی شناخت مقتولہ کے جیٹھ کی حیثیت سے ہوئی۔ دونوں ملزمان نے باہم صلاح مشورہ کرکے مقتولہ کو تشدد کا نشانہ بنا کر غیرت کے نام پر قتل کیا۔

قتل کی واردات کا مقدمہ گشت کرتے پولیس ملازم کی مدعیت میں درج کر لیا گیا اور ملزمان کی گرفتاری کیلئے چھاپے مارے جا رہے ہیں۔یاد رہے کہ اس سے قبل بھی راولپنڈی میں نامعلوم افراد نے فائرنگ کر کے والد اور دو بیٹوں کو قتل کر دیاتھا۔ افسوسناک واقعہ درکالی سیداں میں پیش آیاتھا۔ واقعہ کی اطلاع ملتے ہی پولیس کی بھاری نفر ی اور ریسکیو اہلکار موقع پر پہنچ گئے جنہوں نے لاشوں کو فوری طور پرہسپتال منتقل کیاتھا۔

ایس ایچ او تھانہ جاتلی کے مطابق واقعہ دیرینہ دشمنی کا نتیجہ تھا۔ملزمان نے مقتولین کے گھر میں داخل ہو کر سوئے ہوئے باپ اور 2 بیٹوں پر فائرنگ کر دی تھی۔ مقتولین کی شناخت مشتاق شاہ، عمران شاہ اور رضوان شاہ کے نام سے ہوئی ہے۔پولیس کا کہنا تھا کہ ابتدائی تحقیقات کے مطابق واقعہ سابقہ دشمنی کا شاخسانہ لگتا تھا۔ ایس ایچ او تھانہ جاتلی کے مطابق فائرنگ سے جاں بحق ہونے والوں میں مشتاق شاہ اور اس کے دو بیٹے شامل ہیں۔ دو افراد موقع پر ہی جاں بحق ہوئے جبکہ تیسرا زخمی دوران علاج ہسپتال میں دم توڑ گیا تھا۔پولیس حکام کے مطابق ابتدائی طور پر دو افراد زیرحراست ہیں۔ سی پی او نے نوٹس لے کر ایس پی صدر کو موقع پر پہنچنے اور ملزمان کی فوری گرفتاری کی ہدایت کی تھی۔