گریٹر اسرائیل کا تصور عالمی قانون اور اقوام متحدہ کے چارٹر کی کھلی خلاف ورزی ہے، پاکستان

جمعہ 15 اگست 2025 21:18

اسلام آباد (اُردو پوائنٹ اخبارتازہ ترین - آن لائن۔ 15 اگست2025ء)پاکستان نے قابض اسرائیلی طاقت کے گریٹر اسرائیل سے متعلق بیانات مسترد کرتے ہوئے ان کی شدید مذمت کی ہے اور عالمی برادری سے فوری اور عملی اقدامات کا مطالبہ کیا ہے ۔ترجمان دفترخارجہ سے جاری ہونے والے بیان کے مطابق پاکستان نے فلسطینیوں کو غزہ سے جبراً بے دخل کرنے کے منصوبوں کی بھی مذمت کی ہے۔

(جاری ہے)

ترجمان نے کہا کہ عالمی برادری اسرائیلی اشتعال انگیز خیالات کو یکسر مسترد کرے، گریٹر اسرائیل کا تصور عالمی قانون اور اقوام متحدہ کے چارٹر کی کھلی خلاف ورزی ہے۔ ترجمان دفتر خارجہ نے کہا کہ اسرائیلی بیانات غیر قانونی قبضے کو مضبوط کرنے کا ارادہ ظاہر کرتے ہیں، عالمی برادری فوری اور عملی اقدامات کرے۔ ترجمان دفتر خارجہ نے کہا کہ قابض طاقت کو خطے میں مزید عدم استحکام پیدا کرنے سے روکا جائے، فلسطینی عوام کے حق خودارادیت کی مکمل حمایت کا اعادہ کرتے ہیں، 1967 سے پہلے کی سرحدوں پر آزاد فلسطینی ریاست کے قیام کی حمایت کرتے ہیں،القدس الشریف کو فلسطین کا دارالحکومت بنانے کی حمایت کرتے ہیں۔