وفاقی وزیر تجارت جام کمال سے چینی سفیر کی ملاقات، باہمی تجارت اور سرمایہ کاری کے فروغ بارے گفتگو کی

منگل 17 جون 2025 15:47

اسلام آباد (اُردو پوائنٹ اخبارتازہ ترین - اے پی پی۔ 17 جون2025ء) وفاقی وزیر برائے تجارت جام کمال خان سے عوامی جمہوریہ چین کے سفیر جیانگ زائیڈونگ نے منگل کو یہاں خیرسگالی ملاقات کی اور پاکستان کی حالیہ معاشی اصلاحات اور پالیسی اقدامات کو سراہا۔ جاری بیان کے مطابق چینی سفیر کے ہمراہ اعلیٰ سطحی وفد بھی تھا جس میں منسٹرز قونصلر ز یانگ گوانگیوان اور شو ہانگتیان ،سیکنڈ سیکرٹری وانگ چُن،تھرڈ سیکرٹری ژانگ ڈاٹوو اور اتاشی لیو لیزہن، یانگ ڈاپینگ اور وانگ جِنگ جیو بھی شامل تھے۔

ملاقات میں دونوں فریقوں نے باہمی تجارت اور سرمایہ کاری کے فروغ پر مفید اور تعمیری گفتگو کی۔ اس دوران پاکستان اور چین کے درمیان موجودہ اقتصادی تعلقات کا جائزہ لیا گیا اور تعاون کو مزید مضبوط بنانے کے امکانات پر تبادلہ خیال کیا گیا،خاص طور پر ابھرتے ہوئے شعبوں میں تعاون کو فروغ دینے پر زور دیا گیا۔

(جاری ہے)

دونوں ممالک نے اس عزم کا اعادہ کیا کہ وہ باہمی اقتصادی انضمام کو مزید گہرا کریں گے، پائیدار تجارتی طریقوں کو فروغ دیں گے اور اشیا، خدمات اور مہارتوں کے تبادلے کو آسان بنائیں گے۔

ملاقات میں اس بات پر اتفاق کیا گیا کہ تمام سطحوں پر قریبی روابط اور باقاعدہ تبادلوں کو جاری رکھا جائے گا تاکہ جاری اقدامات پر مؤثر عمل درآمد یقینی اور تعاون کے نئے مواقع تلاش کیے جا سکیں۔ملاقات ایک مشترکہ وژن پر اختتام پذیر ہوئی جس میں دونوں ممالک کی جامع ترقی، علاقائی رابطوں اور طویل المدتی خوشحالی کو فروغ دینے پر اتفاق کیا گیا۔ملاقات میں چینی سفیر نے حکومتِ پاکستان کی حالیہ معاشی اصلاحات اور پالیسی اقدامات کو سراہا ۔ اُنہوں نے پاکستان کی مضبوط معاشی بحالی کی بھی تعریف کی ۔ انہوں نے پاکستان کی معیشت کو استحکام اور پائیدار ترقی کی راہ پر گامزن کرنے پر وزیراعظم محمد شہباز شریف کی قیادت کو بھی سراہا۔\932