جیکب آباد،ریلوے ٹریک پر زور دار دھماکہ،جعفرایکسپریس کی 6بوگیاں پٹڑی سے اتر گئیں

واقعے میں کسی قسم کے جانی نقصان کی اطلاع نہیں ملی،ریسکیو ٹیموں نے بروقت کارروائی کرتے ہوئے بوگیوں میں پھنسے مسافروں کو بحفاظت نکال لیا، ٹرین کی آمدورفت معطل کر دی گئی جبکہ متاثرہ ٹریک کی مرمت اور بحالی کیلئے ریلیف آپریشن شروع

فیصل علوی بدھ 18 جون 2025 11:43

جیکب آباد،ریلوے ٹریک پر زور دار دھماکہ،جعفرایکسپریس کی 6بوگیاں پٹڑی ..

جیکب آباد(اردوپوائنٹ اخبار تازہ ترین۔18جون 2025)بلوچستان کے علاقے جیکب آباد میں ریلوے ٹریک پر زور دار دھماکہ ہوا،جعفرایکسپریس کی 6 بوگیاں پٹڑی سے اتر گئیں،ابتدائی اطلاعات کے مطابق واقعے میں کسی قسم کے جانی نقصان کی اطلاع نہیں ملی،دھماکے کی اطلاع ملتے ہی پولیس کی بھاری نفری اور ریسکیو اہلکار موقع پر پہنچ گئے اور امدادی کارروائیاں شروع کر دی گئیں۔

ریسکیو ٹیموں نے بروقت کارروائی کرتے ہوئے بوگیوں میں پھنسے مسافروں کو بحفاظت نکال لیا۔پولیس نے فوری طور پر علاقے کو گھیرے میں لے لیا۔ریلوے ٹریک پر دھماکے کے بعد ٹرین کی آمدورفت معطل کر دی گئی جبکہ متاثرہ ٹریک کی مرمت اور بحالی کیلئے ریلوے عملہ متحرک ہے۔ریلوے حکام کے مطابق ٹریک کی مکمل بحالی میں چند گھنٹے لگ سکتے ہیں۔

(جاری ہے)

جبکہ واقعے کی مکمل تحقیقات کا آغاز کر دیا گیا ہے۔

ترجمان ریلوے کاکہنا ہے کہ پاکستان ریلوے نے ریلیف آپریشن شروع کر دیا ہے۔دھماکے سے جعفر ایکسپریس کی 6 بوگیاں پٹڑی سے اتر گئیں۔بوگیاں ڈی ریل ہونے کی وجہ کا تعین کیا جارہا ہے۔سیکیورٹی فورسز کسی ممکنہ تخریب کار کی تفتیش کررہی ہیں۔ پولیس کا کہنا ہے کہ دھماکے کی نوعیت کا پتا لگایا جارہا ہے۔یاد رہے کہ چند روز قبل بھی بلوچستان کے علاقے قلات اور مچھ میں زوردار دھماکوں میں سیکیورٹی فورسز اور ریلوے انفراسٹرکچر کو نشانہ بنایا گیاتھاجس میں سیکورٹی فورسز کا ایک اہلکار زخمی ہوگیاتھا۔

دھماکے کی اطلاع ملنے کے بعد سیکیورٹی فورسز نے علاقے کو گھیرے میں لے کر سرچ آپریشن شروع کر دیا تھا۔بتایاگیاتھا کہ قلات کے علاقے منگوچر میں سیکیورٹی فورسز کی چیک پوسٹ کے قریب زور دار دھماکہ ہواتھا۔ لیویز ذرائع کے مطابق دھماکے کا ہدف سیکیورٹی فورسز کی بم ڈسپوزل ٹیم (بی ڈی ٹیم) تھی۔ واقعے میں ایک اہلکار زخمی ہوا جسے فوری طور پر طبی امداد کیلئے ہسپتال منتقل کر دیا گیاتھا۔

دوسری جانب مچھ کے علاقے میں ریلوے ٹریک پر ہونے والے دھماکے میں ریلوے لائن کو جزوی نقصان پہنچاتھا۔ تاہم کوئی جانی نقصان نہیں ہواتھا۔ پولیس کے مطابق دھماکے کے فوراً بعد سیکیورٹی فورسز نے علاقے کا محاصرہ کر لیا اور تحقیقات کا آغاز کر دیا گیا تھا۔ دھماکے کے بعد سیکیورٹی فورسز نے علاقے کو گھیرے میں لے کر سرچ آپریشن بھی کیا تھا اور مزید تحقیقات کیلئے شواہد اکٹھے کر لئے گئے تھے۔