آن لائن ٹیکسی سروس کریم کا پاکستان میں اپنی سروس بند کرنے کا اعلان

صارفین کو جلد ہی کریم والٹ میں فنڈز واپس لینے کے طریقہ کار سے متعلق ہدایات موصول ہوں گی

ساجد علی بدھ 18 جون 2025 14:11

آن لائن ٹیکسی سروس کریم کا پاکستان میں اپنی سروس بند کرنے کا اعلان

اسلام آباد ( اُردو پوائنٹ اخبارتازہ ترین۔ 18 جون 2025ء ) دنیا کی معروف آن لائن ٹیکسی سروس کمپنی کریم نے پاکستان میں اپنی سروس بند کرنے کا اعلان کر دیا۔ تفصیلات کے مطابق متحدہ عرب امارات سے تعلق رکھنے والی آن لائن ٹیکسی سروس نے اعلان کیا ہے کہ 18 جولائی 2025ء سے پاکستان میں کریم کی رائیڈ ہیلنگ سروسز بند کر دی جائیں گی، جس کے ساتھ ہی کمپنی اپنی بڑی مارکیٹس میں سے ایک قرار دیئے جانے والے پاکستان میں سالوں پر محیط اپنا سفر اختتام پذیر کر رہی ہے۔

اس حوالے سے کمپنی کی جانب سے کہا گیا ہے کہصارفین کو جلد ہی کریم والٹ میں فنڈز واپس لینے کے طریقہ کار سے متعلق ہدایات موصول ہوں گی، کمپنی کی کسٹمر سپورٹ سہولت کریم کیئر سروس 18 ستمبر 2025ء تک دستیاب رہے گی تاکہ صارفین اپنے کسی بھی متعلقہ معاملے کو حل کرسکیں۔

(جاری ہے)

اس سلسلے میں مزید معلوم ہوا ہے کہ کمپنی کو پاکستان کے مشکل معاشی ماحول میں سرمایہ کاری کے لیے درکار وسائل کے حصول میں مشکلات کا سامنا کرنا پڑا، جس کی ایک بنیادی وجہ پاکستان میں دو مزید کمپنیوں یانگو (Yango) اور ان ڈرائیو (inDrive) آنا ہے جنہوں نے اپنی سروس اور مناسب کرایوں کی وجہ سے مارکیٹ میں اپنے قدم جما لیے ہیں اور زیادہ تر صارفین کی جانب سے ان دونوں کمپنیوں کو ترجیح دی جارہی ہے۔

بتایا جارہا ہے کہ کریم نے 2016ء میں پاکستان میں اپنی خدمات کا آغاز کیا تھا اور کمپنی کو صارفین کی جانب سے خاص طور پر کراچی، لاہور اور اسلام آباد میں کافی اچھا رسپانس ملا کیوں کہ اس دوران میں پاکستان میں 3G اور 4G کنیکشنز عام ہونے کے باعث ڈیجیٹل ادائیگیوں کے رجحان میں بھی اضافہ دیکھا گیا، کمپنی کی جانب سے کریم کار، کریم بائیک اور کریم ڈیلیوری جیسی سروسز متعارف کروائی گئیں تاہم اب یہ کمپنی مقابلے کے بڑھتے ہوئے دباؤ کے باعث رائیڈ ہیلنگ سیکٹر سے انخلاء پر مجبور ہوگئی۔