حمزہ علی عباسی نے شوبز چھوڑنے کے بیان کی وضاحت کردی

میں خدا اورآخرت سے متعلق کچھ نتائج پر پہنچا ہوں اور مجھے اس بارے میں جاننا ہے جس کیلئے میں شوبز سے بریک لے رہا ہوں،اداکار

جمعرات 19 جون 2025 13:30

حمزہ علی عباسی نے شوبز چھوڑنے کے بیان کی وضاحت کردی

کراچی (اُردو پوائنٹ اخبارتازہ ترین - این این آئی۔ 19 جون2025ء)پاکستان فلم اور ڈرامہ انڈسٹری کے نامور اداکار حمزہ علی عباسی نے شوبز انڈسٹری سے کنارہ کرنے کے بیان پر وضاحت کردی۔حمزہ علی عباسی نے 2019 میں اسلام سے قریب ہونے کیلئے شوبز انڈسٹری سے کنارہ کرنے کا بیان دیا تھا جس کے بعد وہ کئی عرصے تک کسی بھی ڈرامہ یا فلم انڈسٹری میں نظر نہیں آئے۔

اداکار نے مختلف انٹرویوز میں بھی شوبز سے وقتی کنارہ کرنے اور اسلامی نظریے پر بات کی۔حال ہی میں اداکار نے ایک انٹرویو دیتے ہوئے شوبز چھوڑنے کے بیان کی ضاحت کرتے ہوئے بتایا کہ میں نے اپنی ویڈیو میں شوبز کو خیرباد کرنے کا نہیں کہا تھا، میں نے کہا کہ میں خدا اور آخرت سے متعلق کچھ نتائج پر پہنچا ہوں اور مجھے اس بارے میں جاننا ہے جس کیلئے میں شوبز سے بریک لے رہا ہوں، میں نے یہ بھی کہا کہ یہ نہ سمجھا جائے کہ میں اسلام کی خاطر فنون لطیفہ چھوڑ رہا ہوں۔

(جاری ہے)

انہوں نے کہا کہ جس اسلام کی تشریح سے میں متفق ہوں اور میں اسکالر جاوید احمد غامدی کو فالو کرتا ہوں یہ نام میں نے اپنی ویڈیو میں بھی لیا تھا جس کے مطابق ایک اخلاقیات میں رہ کر فنون لطیفہ جائز ہے، اس لیے یہ نہ سمجھا جائے میں شوبز چھوڑ رہا ہوں۔حمزہ علی عباسی نے مزید بتایا کہ میں امریکی ریاست ٹیکساس کے شہر ڈلاس میں ان کے پاس پڑھنے بھی گیا، پوری ویڈیو کسی نے نہیں دیکھی اور اگلے دن خبروں میں ہیڈ لائنز لگی ہوئی تھی کہ میں نے شوبز کو چھوڑ دیا جسے دیکھ کر تو میں سر پکڑ کر بیٹھ گیا کہ 17 منٹ کی ویڈیو کسی نے نہیں دیکھی، پہلے 4 منٹ کی ویڈیو دیکھ کر ہیڈ لائنز بنا دیں۔